Defender o dereito a formar unha parella e ter unha vida afectiva plena por parte das persoas con discapacidade intelectual é o obxectivo último do programa Vivíndonos na Diversidade que se levará a cabo entre os centros Quérote+ e as sete entidades Down en Galicia. Trátase dun programa de educación afectivo-sexual orientado tanto a persoas coa síndrome de Down e discapacidade intelectual, como ás súas familias e ao equipo profesional que traballa nas entidades Down. O programa comezará en marzo coa participación de arredor de 160 usuarios que contarán con asesoramento para aprender a superar os condicionantes persoais, familiares e sociais relacionados coa súa vida afectivo-sexual.

Segundo afirmou o presidente de Down Galicia, Delmiro Prieto, “o noso reto consiste en recoñecer e respectar os tempos de crecemento das persoas con discapacidade e en saber aceptar unha condición de adulto en vez dunha eterna infancia. Defendemos o dereito das persoas con discapacidade a ter un proxecto de vida, e nese proxecto de vida debe contemplarse o dereito a formar unha parella e ter unha vida afectiva plena”. Delmiro Prieto resaltou a necesidade de loitar contra mitos e prexuízos que restrinxen e limitan o círculo afectivo das persoas coa síndrome de Down e a necesidade de facilitarlle modelos e ensinanzas persoais e sociais acordes coas súas etapas vitais e o entorno no que viven. Destacou que nun contexto no que se está a avanzar en inclusión social, sobre todo nos ámbitos escolar e laboral, as persoas con discapacidade intelectual amplían o seu mundo de relación e teñen máis recursos, polo que é preciso ofrecerlles tanto a eles como ás súas familias, os recursos necesarios para que se convertan en suxeitos activos das súas propias relacións afectivas. Neste sentido, Delmiro Prieto, explicou a necesidade de considerar a educación neste ámbito como un chanzo máis na inclusión social de cara a favorecer a autonomía persoal deste colectivo, axudándolles a aceptarse e a entender os seus sentimentos, a elixir, a compartir e a interesarse polos demais..