Tres persoas coa síndrome de Down acadaron un contrato de traballo dun ano de duración na empresa Gadis, a través do programa “Emprego con Apoio” desenvolvido pola entidade Down Lugo. Os supermercados nos que xa se poden atopar estes novos traballadores son os Gadis da Avenida de A Coruña, en Lugo cidade, o Gadis de Becerreá e o Gadis de Ribadeo.
Estes contratos xorden da colaboración das empresas ordinarias, como la de Gadis, e o programa de emprego con apoio de Down Lugo. Isto é posible grazas à metodoloxía denominada “emprego con apoio”, orientada á inclusión laboral de persoas con discapacidade en empresas ordinarias contando coa figura dun preparador laboral (profesional que se encarga de ensinar á persoa con discapacidade no posto de traballo), e que non supón custe algún para a empresa. Este tipo de apoio no posto é gradual, comezase cun apoio intensivo para pasar a un apoio de seguimento, segundo o traballador vai adquirindo autonomía, de xeito que se forma a un traballador a medida do posto de traballo ofertado. O programa de emprego con apoio leva implantado desde o 2002 na asociación luguesa e, actualmente, existen oito contratos de traballo en diferentes empresas desta provincia: Gadis, L&M, Colexio Maristas e Pizza Móvil. É necesario resaltar que a participación e, cada vez maior presenza das persoas con discapacidade intelectual nas empresas ordinarias contribúe de forma eficaz a desterrar os tópicos que tradicionalmente se lles atribúen, resultando un modo sumamente eficaz de integración social. Contribúe, asimesmo, a propiciar un cambio de visión, de persoa con discapacidade a traballador, constatándose unha importante implicación dos compañeiros e compañeiras de traballo na aceptación da diversidade..