21 de marzo de 2012
As persoas coa síndrome de Down e discapacidade intelectual queremos poñer de manifesto que somos persoas con dereitos e deberes e queremos que se nos recoñezan. Queremos que se nos permita vivir de xeito digno e autónomo, gozar das mesmas oportunidades que calquera persoa da sociedade galega e que se nos dea a oportunidade de facer oír a nosa voz.
Neste día tan importante para nós, queremos comezar dicindo que somos distintos, pero non inferiores. Que ter síndrome de Down non impide que sexamos útiles para nós mesmos e para a sociedade.
- Queremos que se recoñezan as nosas capacidades, que non se nos considere cidadáns de segunda. Por iso manifestamos que:Queremos estudar cos nosos compañeiros e compañeiras, con e sen discapacidade, sen que nos saquen da aula ordinaria. Pedimos que non se permita que quedemos fóra do sistema xeral de educación, e que se nos garanta o acceso ao ensino inclusivo, de calidade e gratuíto, en igualdade de condicións que os demais.
- Queremos ter a oportunidade de acceder a un posto de traballo e poder gañarnos a vida como calquera persoa. Pedimos que se apoie a promoción profesional e as oportunidades de emprego para as persoas con capacidades distintas, tanto no mercado laboral ordinario como no sector público.
- Queremos que se nos permita ter unha vida afectiva plena e que non se limite a nosa sexualidade. As persoas coa síndrome de Down non somos nenos e nenas eternamente, evolucionamos ao longo de todas etapas da vida igual que os demais. Temos dereito a recibir educación afectiva e sexual igual que o resto de persoas da nosa idade para, nun futuro, poder disfrutar dunha vida en parella.
- Queremos vivir da forma máis independente posible, e poder elixir o lugar e a persoa que conviva con nós. Queremos ter a oportunidade de emanciparnos, e solicitamos un sistema de acceso á vivenda que se adapte ás nosas circunstancias.
- Queremos que se nos recoñezan as nosas capacidades. Tamén por parte dos xuíces e tribunais. Temos dereito ao recoñecemento da nosa capacidade xurídica en igualdade de condicións que os demais en todos os aspectos da vida. Queremos que se nos deixe tomar as nosas propias decisións e que se nos apoie cando o precisemos.
- Queremos a colaboración das institucións e dos medios de comunicación para que a sociedade poida entender que temos desexos, soños e metas como calquera cidadán. Para elo é necesario promover a toma de conciencia sobre as nosas capacidades en positivo e loitar contra os estereotipos e os prexuízos.
Hoxe é o Día Mundial da síndrome de Down. Queremos facer oír a nosa voz para dicir que queremos vivir a nosa propia vida, porque podemos, porque queremos, e porque temos o dereito a facelo.
Moitas grazas.