O Presidente da Deputación de A Coruña visita a sede de Down Compostela para coñecer as principais demandas da Fundación
A entrega dos primeiros premios Down Compostela reuniu no Hostal dos Reis Católicos a máis de 200 persoas. Na gala, copresentada por Ramón Castro, e na que os principais protagonistas foron os mozos con trisomía 21, Down Compostela lembrou os seus quince anos de historia, desde que en 1997 se constituíu como asociación e, no 2006, como Fundación. Ningún dos tres premiados (Sofía Cebro, Julio Castro, e Gerardo Conde Roa) quixo botar man dos discursos preparados para a ocasión, “porque esta é unha noite de emocións, de palabras que afloran do sentimento”, como ben explicou ao recoller o seu galardón Julio Castro, director do Hostal.
A Fundación amosou o seu agradecemento en forma de premio a aqueles que no seu nacemento como asociación, en 1997, foron os primeiros en comprometerse co proxecto e apoiar os seus primeiros pasos, tal como sinalou Juan Martínez no seu discurso e logo lembraron os mozos que presentaron aos premiados.
O acto comenzou coa intervención de Cristina Villar, quen deu a benvida aos asistentes e, tras a proxección dun vídeo no que se repasou a traxectoria de Down Compostela, siñalou que lle gustaría “ter un traballo e poder ser independente”, ao tempo que pediu unha oportunidade para “demostrar que podemos e queremos traballar”. Cristina tamén quixo premiar “a nosos pais, aos profesionais de Down Compostela e a todos os que nos apoian”, para culminar a súa intervención lembrando aos presentes que “colaborar coa Fundación merece a pena”.
A primeira galardoada da noite, foi a empresaria Sofía Cebro por promover unha exposición de encaixes de Camariñas a beneficio de Down Compostela en abril de 1997. Esta exposición foi o primeiro acto público da entidade compostelá e con el se deron a coñecer ao tempo que recadaran as 700.000 pesetas (uns 4.000 euros de hoxe) coas que se puxo a andar a Asociación. Sofía Cebro, ao recoller o galardón, devolveu o agradecemento “a estes mozos por confiar en min fai 15 anos” e asegurou que “os socios de Down Compostela son un exemplo de ata onde se pode chegar, de que se se quere, pódese”.
A continuación chegou o premio para o director do Hostal dos Reis Católicos, Julio Castro, como recoñecemento á xenerosidade que demostrou cando abriu as portas do parador compostelán de forma altruista para acoller a mostra benéfica en abril de 1997.
Por último, premiouse ao Concello de Santiago por ser a primeira institución en amosar o seu apoio á entidade, que foi recollido polo actual acalde Gerardo Conde Roa.
Entradas relacionadas
