“As persoas con discapacidade intelectual teñen as mesmas necesidades de orientación académica e profesional que o resto”
Dentro das actividades de sensibilización á sociedade, Teima Down Ferrol levou a cabo unha sesión de formación sobre discapacidade na que participaron 50 alumnas do ciclo superior de Educación Infantil do CIPF Ferrolterra. As participantes visitaron a sede da Asociación ferrolá onde coñeceron o modelo de intervención sobre a discapacidade que levan a cabo as entidades do Movemento Down en Galicia. Un modelo de traballo que se caracteriza por promover a autonomía persoal das persoas coa síndrome de Down e discapacidade intelectual. A formación versou sobre o sistema de apoios que se lle presta ás persoas coa síndrome de Down ao longo de toda a súa vida co fin de acadar as maiores cotas posibles de autonomía e independencia, tanto na súa vida persoal, como nos ámbitos sociais e laborais. A través deste sistema estruturado de apoios conséguese que as persoas con diversidade funcional sexan realmente útiles para si mesmos e para a sociedade. Neste sentido, a aceptación da diferenza e a inclusión como fórmula para acadar unha sociedade máis xusta e equilibrada foron os puntos clave desta formación.
Entradas relacionadas
