O director-xerente da Fundación San Rosendo, José Luis Gavela Varela, e a presidenta da Asociación Down Ourense, Carmen Vila Cid, asinan un convenio de colaboración co fin de promover a integración socio-laboral das persoas con discapacidade intelectual. En virtude de dito convenio, unha persoa membro de Down Ourense comezará nos vindeiros días a traballar nun posto de auxiliar de coidadora durante un período de 3 meses, con opción de prórroga de outros 3. Unha nova oportunidade de inserción laboral que nace co obxectivo último de conseguir que as entidades corporativas se vaian abrindo cada vez máis ao mundo da discapacidade. A través deste tipo de acordos poténciase a integración das persoas con diversidade funcional na sociedade, facilitando a inserción laboral en contornas ordinarias de aquelas persoas con discapacidade que participan no Programa de Emprego con Apoio da Asociación Down Ourense. A través deste programa, as persoas coa síndrome de Down e con discapacidade intelectual asisten a unha formación en habilidades sociolaborais para posteriormente, poder desempeñar un posto de traballo adaptado ao seu perfil, acompañadas nos seus primeiros momentos da figura do preparador laboral, quen estará a cargo da formación na empresa prestando un apoio in situ no posto de traballo.