Un grupo de 13 mozos da Fundación Down Compostela iniciaron un curso de barista, de 10 horas de duración no que aprenderán a preparar diferentes tipos de café e outras bebidas nas que o café é o protagonista. A iniciativa foi promovida por Óscar de Toro entre os actos conmemorativos do 50 aniversario de Cafetería Venecia, en colaboración con Cafento. Para demostrar as habilidades adquiridas, os mozos competiran nun concurso o vindeiro 27 de maio no Pazo de Lestrove, e os integrantes do equipo gañador recibirán como premio unha bolsa de prácticas laborais nos establecementos de Pousadas de Compostela. O curso celebrase os días 15, 16, 22 e 24 de maio nas instalacións de Cafento, no polígono do Tambre e o concurso celebrarase no Pazo de Lestrove, nunha xornada de convivencia entre os participantes no curso e familias da Fundación Down Compostela. Óscar de Toro, que acaba de conseguir o cuarto posto na final Speciality Coffee Association of Europe (SCAE) celebrada a comezos de mes en Madrid, foi o promotor desta iniciativa, enmarcada nas actividades que a cafetería Venecia está organizando para conmemorar os seus 50 anos. Ademais, “é unha forma de contribuír á inserción sociolaboral das persoas con discapacidade intelectual”, sinalou o hostaleiro. Cafento colabora tamén con este curso, ao ceder as súas instalacións do polígono do Tambre para impartir a formación, con Carolina Otero como profesora do mesmo. José Manuel Otero, director de Pousadas de Compostela, e presidente da Asociación de Hostalaría de Santiago, tamén se implicou na iniciativa, ao ofrecer as bolsas de formación para os gañadores e organizar o concurso no Pazo de Lestrove.