O equipo CAFETO foi o gañador do I Concurso de Baristas Down Compostela, celebrado hoxe nas instalacións do Pazo de Lestrove, organizado pola Fundación Down Compostela, Óscar de Toro, Cafento e Pousadas de Compostela, en colaboración coa Asociación de Hostalaría de Santiago. Os sete integrantes do equipo, formado por Manuel, Cristina, Jóse Manuel, Iván, Irene, David e Javier recibirán como premio unha bolsa de prácticas laborais que realizarán no Hostal dos Reis Católicos, NH Obradoiro, Hotel Virxe da Cerca, AC Palacio do Carmen, Puerta del Camino e Tryp Santiago.

O nome do gañador coñeceuse despois de tres empates nas deliberacións do xurado, formado por Víctor Couto e Xosé Ríos, e da votación inicial do público. O outro equipo participante, “Capuchino Down” estaba composto por Elena, Jesús, Alex, Sergio, Carmen e Vanessa.

Nesta xornada déronse cita máis de 150 persoas no Pazo de Lestrove para presenciar o concurso, no que os mozos demostraron as súas calidades no manexo e preparación de cafés e combinados a base de café.

Tanto Óscar de Toro, como Carolina Otero (Cafento) e os membros do xurado destacaron as calidades e capacitación dos mozos participantes, “que parecen auténticos profesionais”, aseguraron. O presidente da Fundación Down Compostela, Juan Martínez, agradeceu a Óscar de Toro e a Carolina Otero que promoveran esta iniciativa “que serviu para demostrar que as persoas con discapacidade intelectual tamén poden ser excelentes baristas e ofrecerlles unha oportunidade laboral”. Ao mesmo tempo agradeceu a implicación de Pousadas de Compostela e da Asociación de Hostalaría de Santiago, e amosou a súa esperanza de que as prácticas laborais que realizarán os mozos nos mellores hoteis de Santiago “se poidan converter en contratos de traballo”.