Dúas mozas do Movemento Down Galicia poñen voz a ‘Valentina’, a protagonista da película de animación nomeada aos Premios Goya
A Fundación Down Compostela celebrou, na véspera do Día Mundial da Síndrome de Down, a gala de entrega dos Premios Down Compostela, cos que este ano quixo recoñecer o traballo a favor da integración escolar e laboral do CEIP Pérez Viondi, Pizza Móvil e do BBVA. Os auténticos protagonistas desta cita foron os mozos e mozas coa síndrome de Down e discapacidade intelectual nunha gala celebrada no Hostal dos Reis Católicos. “Hoxe é un día para celebrar os nosos logros e tamén denunciar as barreiras que aínda hai que eliminar para acadar a plena integración” afirmou Marina Menéndez nunha das súas intervencións. “A educación é o primeiro paso e o máis importante na formación de calquera persoa” indicou Dani López, mentres Pamela Casagrande asegurou que “o traballo nos permite demostrarlle á sociedade as nosas capacidades, convértenos en adultos con todos os dereitos pero tamén con todos os deberes”. Daniel Martínez, pola súa banda, destacou o traballo que realizan “os profesionais, as familias e todos cantos cren nas persoas coa síndrome de Down. Todos xuntos estamos demostrando que unha sociedade mellor é posible”. Marina Menéndez destacou a importancia de que se celebre o Día Mundial da Síndrome de Down “pero aínda é máis importante que todos os días do ano fagamos un esforzo para romper as barreiras e por ser mellores persoas e máis solidarias. Por iso as persoas coa síndrome de Down queremos que todos os nosos días sexan iguais aos teus” engadiu facendo alusión ao eslogan elixido este ano polo Movemento Down Galicia para celebrar o 21 de marzo.
Entradas relacionadas
