Pese ao mencionado descenso, estes datos resultan particularmente salientables no contexto de crise económica actual, no que a pesares da destrución de postos de traballo a nivel xeral e do baixo índice de contratación de persoas con discapacidade intelectual a nivel estatal, o modelo implementado desde o Movemento Down Galicia desde o ano 2002 para acadar a plena inclusión socio-laboral destas persoas, está a producir resultados positivos ano tras ano.
A metodoloxía Emprego con Apoio
Emprego con Apoio é un programa deseñado para atender especificamente as necesidades e barreiras que as persoas coa síndrome de Down e/ou discapacidade intelectual atopan á hora de intentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador laboral encargado de levar a cabo unha formación específica no propio posto de traballo, desenvolvendo estratexias de aprendizaxe para que o traballador poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros de traballo e na mediación na relación con eles para que se desenvolva de xeito positivo e natural.
Paralelamente, as entidades Down realizan un labor de prospección laboral co fin de dar a coñecer esta iniciativa entre o tecido empresarial e acadar a súa colaboración no que se refire a inclusións socio-laborais deste colectivo por medio de contratos e/ou prácticas laborais. Neste sentido, a participación e a cada vez maior presenza das persoas con discapacidade intelectual nas empresas ordinarias contribúe de xeito eficaz a desterrar os tópicos que tradicionalmente se lles atribúe a este colectivo, resultando un xeito sumamente eficaz de integración social.
Vantaxes dos programas de Emprego con Apoio
Estes programas de inserción laboral, ademais de contribuír á integración social das persoas con diversidade funcional, implica un menor custo para o erario público, o que supón un factor clave a ter en conta no contexto da actual crise económica.
Así, unha persoa que traballa nun Centro Especial de Emprego custa á Administración un mínimo de 7.500 euros/ano durante toda a súa vida laboral mentres que unha persoa que traballa mediante Emprego con Apoio custa o primeiro año 9.000 euros, o segundo 6.000 euros e o terceiro e sucesivos 4.500 euros, o que supón un 36 % de aforro respecto ao emprego protexido se tomamos como exemplo unha vida laboral de 20 anos e un 44 % de aforro nunha vida laboral de 30 anos.
Hai que ter en conta ademais que as persoas con discapacidade intelectual que traballan na empresa ordinaria non supoñen gasto algún ao Sistema de Atención á Dependencia (SAAD) e contribúen de xeito activo pagando impostos ao erario público e aportando as súas cotizacións ao sistema de Seguridade Social.
