Down Galicia vén de clausurar a segunda edición do curso Aprendizaxe Cooperativa dirixido a profesionais docentes, de orientación e directivos dos centros educativos de infantil, primaria e secundaria da Consellería de Educación. Trátase dunha acción formativa homologada pola propia Consellería de Educación e que, nesta segunda edición, contou coa asistencia de 80 participantes. O obxectivo do curso é crear aulas máis inclusivas, proporcionando aos participantes un espazo para compartir e reflexionar sobre a súa práctica docente diaria. Para acadar este fin dotouse aos mestres e profesionais de apoio dos instrumentos necesarios para organizar as súas aulas de forma cooperativa e implementar procesos de ensinanza/aprendizaxe onde todos poidan participar de forma equitativa e interactuar de forma simultánea, facendo especial incidencia naqueles alumnos con máis barreiras para a aprendizaxe. No curso,  impartido por Jesús Soldevila da Universidad de Vic, tamén se fomentou a posta en práctica dos contidos teóricos a través de dinámicas para que os asistentes puidesen experimentar, comprender e analizar a aplicación da aprendizaxe, creando espazos para o debate e facilitando a creación dunha rede de colaboración a partires dos encontros xerados no curso..