Nove mozos de Down Compostela, divididos en dous equipos, demostraron esta mañá as súas habilidades como baristas ante os medios de comunicación. Neste encontro coa prensa, os participantes realizaron un “simulacro” da competición que realizarán o vindeiro domingo no Pazo de Lestrove, onde se celebrará o II Campionato de Baristas dirixido a persoas coa síndrome de Down. Durante a demostración púidose apreciar como se organiza o traballo dos equipos participantes. As tarefas divídense entre un presentador, encargado de informar aos asistentes do tipo de cafés que ían preparando os seus compañeiros así como as súas calidades. Por quendas, cada participante realizaba un café diferente -expresso, capuccino, e combinado de café-, sen esquecer a súa correspondente decoración e presentación. Por último, unha persoa de cada equipo, encárgase de presentalo ante o xurado. Un traballo de coordinación, precisión e motivación para alzarse co primeiro posto na final. Tras unha formación de cinco días a cargo de Cafento, organizadora do evento, tanto en Santiago de Compostela como en Vigo, os catro equipos -2 de Down Compostela e 2 de Down Vigo- competirán entre si o domingo 15 de setembro ás 12:00 da mañá no Pazo de Lestrove, en Padrón. Os integrantes do equipo vencedor recibirán como premio a realización de prácticas de traballo nos principais hoteis de Santiago de Compostela e Vigo que, desta forma, contribuirán á inserción socio-laboral das persoas coa síndrome de Down. Os establecementos compostelás que apoian a iniciativa son os hoteis: AC Palacio del Carmen, A Tafona do Peregrino, Hostal dos Reis Católicos, NH Obradoiro, Puerta del Camino, San Lorenzo e Tryp Santiago. Tanto os cursos como o campionato son organizados por Cafento, a Fundación Down Compostela, a Asociación Down Vigo, a Asociación Hostalería de Compostela e Pousadas de Compostela. O curso de Compostela desenvólvese nas instalacións de Cafento (Pol. do Tambre, Vía Faraday, 22) e está sendo impartido por Diego López, asesor barista de Cafento e formador barista homologado polol Fórum do Café. o curso de Vigo estase desenvolvendo nas instalacións do CIFP Policarpo Díaz Equipos participantes Equipo Latte Art. Down Compostela
- Alexandro Lado
- Dani Martínez
- Dani López
- Elías Ledo
Equipo Capuccino. Down Compostela
- Yasmin Malás
- Cristina Feire
- Juan Carlos Castiñeiras
- Manuel Otero
- Álvaro Díez
Equipo 1. Down Vigo
- Lara paula Gómez
- Almudena Gesto
- Roberto Roque
- Victoria Giráldez
- Pilar Troncoso
- Sonsoles Couñago
Equipo 2. Down Vigo
- Alba Pérez
- Patricia Cancelas
- Daniel López
- Víctor Martínez
- Iván Giráldez
- Iago González