Ana, Rocío e Guillermo comezan a traballar en dúas empresas da cidade de Vigo
O equipo Café Molido, da Asociación Down Vigo, foi o gañador do II Campionato de Baristas Down que se celebrou onte no Pazo de Lestrove, mentres que Latte Art, da Fundación Down Compostela, conseguiu o segundo posto. Todos eles foron premiados cunhas prácticas laborais en varios hoteis das súas cidades. Durante 90 minutos, cada un dos equipos tivo que preparar un café expreso, un cappuccino decorado e un cóctel a elixir para someter á valoración do xurado. José Manuel Martínez Yáñez e Xosé Ríos Casal, xuíces do evento, non o tiveron nada doado para decidir o gañador, xa que os catro equipos participantes sorprenderon aos máis de 150 asistentes a esta segunda edición do Campionato de Baristas. A competición, organizada por Cafento, Down Compostela, Down Vigo, a Asociación de Hostalería de Santiago e Pousadas de Compostela, trata de demostrar as calidades das persoas coa síndrome de Down e discapacidade intelectual para desenvolverse no mundo da hostalería e ofrecerlles así unha oportunidade laboral.
Entradas relacionadas
