Grazas a unha achega da Consellería de Cultura, Educación e Ordenación Universitaria, da Fundación ONCE e Fondos FEDER, a Asociación Down Pontevedra “Xuntos” realizou obras en partes do local no que desenvolven habitualmente actividades de carácter cultural. As obras realizadas responden a necesidades de adecuación das instalacións á normativa vixente en materia de seguridade e habitabilidade e afectaron, principalmente, ao sistema eléctrico e aos aseos. Deste xeito, a Asociación Xuntos mellora as condicións físicas desde as que levan a cabo o seu traballo a prol das persoas coa síndrome de Down e discapacidade intelectual, baseado no fin último de acadar as máximas cotas de autonomía e independencia posibles. Así, ao igual que todas as entidades Down da Federación Down Galicia, fundaméntanse na promoción da igualdade, dunha sociedade aberta e plural, libre de prexuízos cara a discapacidade, e que se sinta enriquecida coa diversidade e a participación activa de todo tipo de persoas e colectivos.