A conselleira de Traballo e Benestar, Beatriz Mato, asegurou hoxe que a orde que regulará a acreditación da carteira de servizos para a promoción da autonomía persoal se publicará en breve. Esta foi unha das demandas que lle formularon esta mañá os presidentes da Federación Down Galicia, Delmiro Prieto, e da Fundación Down Compostela, Juan Martínez, na visita que a conselleira realizou ás instalacións da entidade Down en Santiago. A acreditación dos SEPAP (servizos de promoción da autonomía persoal) é unha vella demanda da Federación Down Galicia, cuxas oito entidades están fomentando a autonomía persoal e atendendo a máis de 600 persoas coa síndrome de Down e discapacidade intelectual na nosa comunidade autónoma. Beatriz Mato asegurou que os técnicos da Consellería están ultimando a orde que especificará as condicións que deberán cumprir ditos servizos e os centros nos que se imparten. Beatriz Mato comprometeuse a axilizar estes trámites e coñeceu de primeira man as reivindicacións que lle formularon Delmiro Prieto e Juan Martínez. Estes incidiron na necesidade de axustar as valoracións de dependencia ás necesidades reais das persoas con discapacidade. Ao mesmo tempo, ambos dirixentes coincidiron na necesidade de que desde a Xunta se fomente a asignación de servizos de promoción da autonomía persoal na elaboración dos programas individuais de atención. Durante este encontro, Beatriz Mato asegurou que os programas de cooperación se manterán, ao menos, ata o ano 2015 nas mesmas condicións que na actualidade. Este ano, a Consellería de Traballo destina 370.000 euros a financiar diferentes programas de inserción laboral das entidades Down en Galicia. Entre eles figuran o financiamento con 230.000 euros para contratar a 13 desempregados para a execución de diferentes programas que melloran a calidade de vida das persoas coa síndrome de Down en toda Galicia. Outros 70.000 destínanse ao programa integrado de emprego para facilitar o acceso ao mercado laboral de 60 persoas con discapacidade; a contratación das orientadoras laborais para o servizo de orientación laboral (40.000 euros) e os 28.000 euros cos que a Consellaría financiou o curso de xardinería que desenvolve a Fundación Down Compostela e cuxa evolución puido comprobar a propia Beatriz Mato durante a súa visita. A responsable da Consellería acompañada pola directora xeral de Emprego e Formación, Ana Díaz, departiu durante uns minutos cos mozos e mozas que participan no curso de xardinería e puido ver como acondicionaron o xardín de Down Compostela. Beatriz Mato tamén falou durante uns minutos cos once mozos e mozas que participan no curso de introdución á horticultura e viveiro, que forma parte do programa integrado para o emprego. Mentres departía cos directivos e técnicos de Down Galicia e Compostela, a conselleira puido degustar doces e café que lle prepararon os mozos e mozas que participan no programa de autonomía e vida independente que ten en marcha Down Compostela. Na conversa, Delmiro Prieto lembroulle á conselleira a necesidade de que as persoas que nestes momentos utilizan o servizo 065 para acudir habitual ou esporadicamente ás entidades do movemento asociativo Down en Galicia teñan garantido o transporte unha vez que a Consellería remodele o 065. Beatriz Mato asegurou que todas aquelas persoas con discapacidade que nestes momentos están utilizando o 065, seguirán gozando deste dereito tras a remodelación que a consellería acometerá neste servizo