Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
No marco do Día Internacional e Europeo das Persoas con Discapacidade o CERMI Galicia leu un Manifesto no que se recollen as demandas das organizacións de persoas con discapacidade. Baixo o lema “SOS Discapacidade. Dereitos, Inclusión e Benestar a salvo”, ao acto asistiron persoas con discapacidade xunto coas súas familias, voluntarios e profesionais, en protesta dos recortes sociais que se reuniron para “defender os dereitos e garantías para as persoas con discapacidade e as súas familias, que tanto tempo custou alcanzar e agora ven ameazados”. O Manifesto, que foi lido por persoas con discapacidade, reclama que o actual cambio de modelo de prestación de servizos que está a realizar a Administración Galega, coa implantación da carteira de servizos, “non supoña o desmantelamento dos sistemas de apoio que actualmente temos e que tanto esforzo supuxo conseguir para o movemento asociativo da Discapacidade e as súas familias”. Por iso, no documento pídense “non máis cambios para nós, sen nós; non máis recortes; e non a máis copagos sobre as xa raquíticas pensións”. Elías Ledo, en representación de Down Galicia, ocupouse de ler a parte relativa á educación demandando “unha educación inclusiva plena de acordo coa Convención Internacional sobre os Dereitos das Persoas con Discapacidade, á que se adheriu o Estado español, e rexeitamos de pleno a nova normativa da LOMCE, contraria a ditos dereitos”. O Manifesto tamén reivindica o acceso ao emprego das persoas con discapacidade en Galicia. “Por todos está recoñecido que o emprego é un dos principais instrumentos para a inclusión social e participación cidadá das persoas con discapacidade, igual que para o resto da sociedade”, sinala. Neste sentido pídese “o máis amplo compromiso para que nestes tempos as persoas con discapacidade non desaparezamos completamente do mundo laboral, en dirección á exclusión e á marxinalidade”. “Reclamamos a necesidade dunha inclusión e participación na sociedade que abarque todos os campos da vida, desde a educación até o emprego, pasando pola vida social. Só así, co apoio de toda a sociedade, lograremos a verdadeira inclusión”, reclaman o CERMI Galicia. Á súa vez, a proclama advirte da existencia de “formas agravadas de violencia contra a muller con discapacidade”, que persisten na sociedade entre os que padecen unha situación máis vulnerable pola concorrencia de factores de exclusión social, como a discapacidade, a pobreza e o desemprego, ademais do feito de ser muller, “sen que se tomen medidas ao respecto”. Por último, o Manifesto reclama “o apoio incondicional dos nosos gobernantes ás políticas integradoras para manter, senón incrementar, os nosos logros e seguir coa loita pola inclusión social na nosa comunidade e deixar atrás a exclusión social á que estabamos abocados”.
Entradas relacionadas
