A Asociación Down Ourense vén de presentar, en colaboración coa Concellería de Cultura, a exposición fotográfica na que se basea a selección de fotos realizadas para o seu calendario solidario 2014. A exposición estará colocada durante todo o mes de decembro na Rúa do Paseo, no tramo entre o Banco de España e o Parque de San Lázaro, cunha montaxe de cubos formados por lonas. Ademais, Down Ourense habilitará puntos de venda en diversos lugares da cidade para facilitar a compra dos calendarios solidarios e informar á cidadanía da iniciativa. Así, os días 10 e 12 de decembro poderán mercarse no Hospital Santa María Nai, o día 14 no Centro Comercial Ponte Vella, e os días 17 e 19 na Residencia Cristal Piñor. Os fotógrafos colaboradores nesta ocasión son Juan Louro, Mercedes López Rubín, Mani Moretón e Xoán Piñón. As fotos foron realizadas en lugares emblemáticos de Ourense tales como a Ponte romana, o Liceo, a Catedral, as Termas de Outariz, o Muíño da Veiga, e o Parque de San Lázaro.