Promover a inserción das persoas con discapacidade intelectual no mundo laboral, é o obxectivo do convenio entre o Consorcio da Zona Franca de Vigo e a Asociación Down Vigo. Este convenio vén de entrar en vigor tras ser asinado pola delegada do Consorcio, Teresa Pedrosa, e polo presidente de Down Vigo, Fernando Molina. A través deste acordo, usuarios e usuarias do programa de emprego de Down Vigo realizarán prácticas nas instalacións do Consorcio Zona Franca de Vigo por un período de seis meses, prorrogables ata un ano se así se estima preciso para os obxectivos de formación perseguidos. Coa finalidade de que os beneficiarios poidan acreditar experiencia para o seu currículo laboral, o Consorcio expedirá a cada un dos participantes unha certificación na que se dea conta da realización das prácticas, con indicación das tarefas realizadas e o servizo no que se desenvolveron. Durante a sinatura do convenio, Teresa Pedrosa manifestou que “polas dificultades que teñen as persoas con discapacidade para acceder a un emprego, cando o conseguen, traballan como a mellor”. Asegurou, ademais, que “por experiencia persoal sei que, polo afán de superación das persoas coa síndrome de Down e polo seu empeño en realizar á perfección a tarefa encomendada, xerar postos de traballo para persoas con discapacidade é eficaz, rendible e produtivo para as empresas contratantes”.