A Fundación Grupo Norte apoiará economicamente o proxecto “Emprego con Apoio”, impulsado por Down Galicia e que ten como obxectivo facilitar ás persoas con discapacidade intelectual, especialmente aquelas coa síndrome de Down, a súa incorporación social e laboral no mercado ordinario garantindo para iso todos os apoios que tanto a persoa, a familia como o empregador precisan. Así se establece no convenio asinado polo presidente de Down Galicia, Delmiro Prieto, e o da Fundación Grupo Norte, Javier Ojeda, nun acto que tamén contou coa participación da conselleira de Traballo e Benestar, Beatriz Mato, da secretaria xeral de Política Social, Coro Piñeiro, e de unha das persoas participantes no programa, Pamela Casagrande. O acordo contempla que a Fundación Grupo Norte doará á Federación 50.000 euros ao longo do ano 2014 para facilitar a inclusión de persoas coa síndrome de Down, contemplando entre as súas actividades prioritarias a formación, orientación e asesoramento no ámbito laboral. Este convenio é froito da convocatoria de Proxectos Solidarios que a Fundación Grupo Norte convoca a nivel estatal e na que Down Galicia resultou gañadora co seu programa de emprego, despois de superar un proceso no que concorreron 85 proxectos sociais de 13 comunidades autónomas e resultar o elixido polos propios traballadores de Grupo Norte en votación secreta e electrónica. O proxecto conta ademais co importante compromiso económico da Consellería de Traballo e Benestar da Xunta de Galicia, que desde o ano 2002 financia a maior parte dos custe de persoal mediante unha subvención prorrogable. Destinatarios do proxecto Os destinatarios do proxecto ‘Emprego con Apoio”, son persoas con discapacidade intelectual en xeral e síndrome de Down en particular cunha cualificación de discapacidade superior ao 33% segundo a lexislación vixente, maiores de 16 anos e residentes na Comunidades Autónoma de Galicia. O acceso ao mercado laboral das persoas que forman parte deste colectivo resulta especialmente complexo presentando taxas de paro do 90% en homes e do 99% no caso das mulleres. A importancia deste proxecto reside no feito de que a integración laboral das persoas con discapacidade no sistema ordinario de traballo segue supoñendo hoxe en día un reto para a sociedade. Ata fai uns anos, as persoas coa síndrome de Down ou discapacidade intelectual en xeral, mantivéronse á marxe de toda actividade laboral competitiva e, por extensión, de outros moitos ámbitos da sociedade. A súa falta de formación específica, ausencia de expectativas laborais e descoñecemento de outras realidades, impedía que se integraran plenamente no mundo laboral. Na actualidade, e froito dos esforzos das familias e das organizacións sociais, os usuarios desexan acadar un traballo ao consideralo un espazo de recoñecemento público básico para a construción dun rol activo e participativo. Un traballo supón ocupar un lugar na sociedade: a meta de calquera cidadán adulto, xa que grazas a el, pódense acadar grandes cotas de autonomía e de independencia, ademais da económica con acceso ao traballo.