A Consellería de Política Social colabora con varios programas formativos da Federación
A Rede Galega contra a Pobreza, EAPN-Galicia, aprobou, en asemblea xeral extraordinaria, un ambicioso plan de actuación no que se aposta firmemente pola defensa dos dereitos sociais, a participación, a inclusión e o empoderamento das persoas. As 125 entidades que forman parte de EAPN-Galicia consideran que son necesarios máis esforzos para lograr reducir as cifras tan elevadas que ten Galicia en pobreza e exclusión social. Segundo os últimos datos de decembro de 2013, o 47% dos fogares galegos vive de prestacións por desemprego, subsidios, ou pensións. Ademais, hai máis de 448.000 persoas que viven baixo o limiar da pobreza, o que supón un 16,5% do total da poboación. En total, e segundo o informe Quen Somos? presentado na Asemblea, as entidades membro de EAPN-Galicia contaron con 4304 persoas voluntarias, 19.000 persoas asociadas e 453.534 beneficiarias e/ou usuarios. Unha realidade que non se ve acompañada dun recoñecemento das Organizacións non Lucrativas do Terceiro Sector de Acción Social como actores imprescindibles, non complementarios, na prestación de servizos sociais públicos ou como coñecedores da situación que viven as persoas en risco de exclusión ou pobreza. Neste senso, dende EAPN Galicia valorase positivamente a nova Lei de Inclusión, unha normativa que mellora o marco lexislativo existente pero tamén se incide na necesidade de chegar a unha aplicación real que finalmente repercuta positivamente nas persoas e nos seus lexítimos dereitos, sen caer na lacra do asistencialismo.
Entradas relacionadas
