A Xunta subvenciona a contratación de 10 persoas para postos técnicos da Federación durante o último período
David Conde, director comercial da Territorial Noroeste de BBVA; e Delmiro Prieto, presidente de Down Galicia; entregaron os diplomas certificativos do programa de prácticas formativas de BBVA aos 33 membros da Federación Down Galicia que participaron ao longo de 2013 nesta iniciativa, cuxo obxectivo é promover a inclusión socio-laboral das persoas con discapacidade. Grazas a esta iniciativa pioneira en España, os mozos e mozas coa síndrome de Down participantes adquiriron unha experiencia laboral que lles axudará no proceso de busca de emprego, ademais de mellorar as súas habilidades sociais para a súa integración en diferentes equipos de traballo. A entrega de diplomas celebrouse no Parador de Santiago de Compostela e contou coa presenza de Reyes Leis, primeira tenente de alcalde do Concello de Santiago. “En BBVA sentímonos especialmente orgullosos desta iniciativa, impulsada pola Oficina de Voluntarios do Banco, porque supón un claro exemplo do noso firme compromiso coa sociedades nas que estamos presentes e en especial coa sociedade galega. En BBVA traballamos por un futuro mellor para as persoas, e cremos firmemente en que se é posible, está feito; e se é imposible, faremos”, apuntou David Conde. Pola súa parte, o presidente de Down Galicia, Delmiro Prieto, agradeceu a BBVA “a oportunidade non só para adquirir novos coñecementos e destrezas, senón para visibilizar as capacidades das persoas coa síndrome de Down á hora de desempeñar un posto de traballo que ata fai uns anos era impensable que puidesen realizar”, ao tempo que aproveitou para felicitar a todos os participantes “polo rendemento que demostraron no exercicio das súas tarefas” Ao longo do 2013, os 33 membros de Down Galicia traballaron en sesións de catro horas diarias durante un período de un ou dous meses cada un, en actividades administrativas: arquivo e destrución de documentos, fotocopiar expedientes e documentacións diversas, ordenar fichas de sinaturas, arquivo de contratos e documentación xerada no día e tratamento de recibos, entre outras funcións. Neste sentido, Lara Gómez, unha das mozas participantes no programa que interveu no nome dos seus compañeiros e compañeiras destacou a implicación da plantilla de traballadores de BBVA. “Todos os compañeiros de traballo portáronse moi ben con nós e ensináronnos como facer as tarefas no posto” manifestou, para a continuación agradecer a oportunidade de “mostrar as nosas capacidades”.
Entradas relacionadas
