Down Galicia contrata 9 profesionais para postos técnicos da Federación ao abeiro dos Programas de Cooperación 2021-2022
Representantes da Rede Galega contra a Pobreza (EAPN-Galicia) mantiveron un encontro coa Conselleira de Traballo e Benestar, Beatriz Mato, para analizar a situación de temas como a Lei de Inclusión, a xestión dos Fondos Estruturais 2014 – 2020, e a inclusión de cláusulas sociais na contratación pública de servizos sociais. Sobre este último asunto, EAPN-Galicia pediulle á conselleira que seguindo a futura directiva europea de contratación pública, se comecen a incluír nos contratos públicos cláusulas sociais, para que as entidades non lucrativas do Terceiro Sector poidan concorrer en igualdade de condicións a esta contratación. Lémbranlle a Mato que as organizacións non gobernamentais, polo seu traballo directo coas persoas, son as que mellor coñecen as necesidades e os apoios que deben prestarse, polo que debe aproveitarse este coñecemento para conseguir unha actuación realmente eficaz e eficiente baseada na calidade dos servizos. O presidente de EAPN-Galicia, David Silva, engadiu que deste xeito “foméntase a inclusión sociolaboral das persoas e colectivos máis vulnerables da sociedade”. Neste senso, a conselleira comprometeuse a falar co presidente da Xunta e coas Consellerías de Sanidade e Educación para intentar modificar esta situación. Respecto á Lei de Inclusión, desde EAPN-Galicia fan unha valoración positiva, xa que se incorporaron moitas das súas demandas, pero pídenlle á Xunta que ‘non quede en papel mollado’ e que realmente sexa un instrumento útil para loitar contra a pobreza. Desde a Rede amosan a súa preocupación polo aumento da pobreza e a exclusión (case 640.000 persoas en Galicia) e piden que se destinen máis recursos e profesionais á aplicación desta Lei. “Uns recursos o máis próximos posible aos cidadáns que teñan como obxectivo o apoio e asesoramento necesarios para que as persoas poidan comezar un proceso de inclusión e atopen un emprego. Que non quede en axudas materiais puntuais”, explica Silva, “porque o noso obxectivo non é subvencionar ás persoas pobres, senón erradicar a pobreza e a desigualdade”. Xa por último, na xuntanza tamén se falou sobre o deseño, xestión e control dos Fondos Comunitarios da Unión Europea de cara ao período 2014-2020. Desde EAPN-Galicia, como representantes de 125 entidades do terceiro sector de Galicia, demándanlle á Xunta estar presentes neste organismo de coordinación, co obxectivo de que os fondos europeos sirvan para lograr a redución da pobreza e a exclusión social que marca Bruxelas na súa Estratexia 2020. Unha idea que comparte Beatriz Mato e que lle trasladará tamén á Conselleira de Facenda. A Rede pon como exemplo Castela La Mancha ou Canarias, onde os gobernos incluíron xa na comisión as súas EAPN autonómicas. Para David Silva, “só dende o diálogo, o intercambio de experiencias ou coñecementos e a transparencia podemos conseguir que a inclusión social e a loita contra a pobreza sexa a prioridade de todos e todas e ser un referente de xestión”.
Entradas relacionadas
