A Federación Down España incorporou por primeira vez á súa Xunta Directiva unha persoa con trisomía 21. A viguesa de 33 anos Ruth Ramos Núñez, que forma parte da Asociación Down Vigo, é a nova vogal da directiva da Federación estatal. “Síntome moi orgullosa de poder representar nesta Xunta Directiva a todas as persoas coa síndrome de Down, e é para min unha gran responsabilidade”, asegurou Ruth Ramos na súa intervención ante a Asemblea. Expendedora dunha gasolineira de Repsol en Bouzas (Vigo), Ruth Ramos reclamou o dereito que teñen as persoas coa síndrome de Down a traballar e a ter unha vida independente. “Aos empresarios pídolles que perdan o medo a contratarnos, porque somos bos traballadores e bos compañeiros”, afirmou esta viguesa. “Ás familias pídolles que nos escoiten e que nos deixen tomar as nosas propias decisións”, engadiu, para asegurar que “a vida independente é unha meta para cada un de nós. Pídovos que nos acompañedes nesta viaxe”. Ruth Ramos concluíu a súa intervención mostrándose orgullosa de representar ás persoas coa síndrome de ás que poderi coñecer a partir de agora”. A Xunta Directiva está composta polo cordobés Fabián Cámara, que continua como presidente de Down España, acompañado por Juana Zarzuela (vicepresidenta 1ª), Mª Ángeles Agudo (vicepresidenta 2ª), Pilar Sanjuán (secretaria), Juan Martínez de Down Compostela(tesoureiro) e os vogais Ruth Ramos, Mateo Sansegundo, Nieves Doz, Francisco Muñoz, Diego González. Como suplentes deste equipo figuran Manuel Velázquez, Marcelina de la Vega e María del Mar Rodríguez. A educación inclusiva e o Tribunal Constitucional Ante as recentes decisións do Tribunal Constitucional con relación ás demandas de elección dunha educación inclusiva para os seus fillos por parte das familias de persoas coa síndrome de Down, e preocupados pola carencia de políticas educativas en España de fomento da inclusión, derivadas da LOMCE, a Asemblea Xeral de Down España quixo poñer de manifesto:
- O seu rexeitamento ante a aplicación da nova Lei de Educación, e ante as recentes sentencias emitidas polo Tribunal Constitucional.
- A súa preocupación por constatar a falta de valentía e dunha visión a favor da sociedade inclusiva que reflectiu o máximo organismo constitucional.
- O seu abatemento por comprobar que se pechan portas ao impulso e fomento da inclusión educativa no noso país.
- A súa inquietude pola posibilidade de que se estenda a idea de que a inclusión educativa é algo graciable ou dependente dos recursos dispoñibles, cando Down España entende que se trata da aplicación dun mandato constitucional, xa que o noso país está obrigado a aplicar as convencións de dereitos humanos que ten ratificados. E neste caso, ademais, de cumprir cos mandatos reflectidos na Convención Internacional sobre los Derechos de las Personas con Discapacidad que España asinou no 2008.