No pasado exercicio 2013, un total de 118 persoas coa síndrome de Down e/ou discapacidade intelectual contaron polo menos cun contrato de traballo ou cunha práctica laboral. Este dato supón que o 77,63% das persoas usuarias do programa de emprego con apoio das entidades Down en Galicia tivo acceso a un posto de traballo nese período. Sen embargo, o principal escollo para o colectivo de persoas con discapacidade intelectual segue a ser a inestabilidade e a temporalidade nas contratacións. Así, no ano 2013 no marco do programa de emprego con apoio, asináronse un total de 160 contratos e 31 prácticas laborais –aos que accederon estas 118 persoas- o que pon de manifesto a curta duración das contratacións en moitos dos casos. Aínda que con respecto ao ano 2013 se incrementa nun 11,02% o número de persoas que consiguen un contrato ou práctica laboral, o acceso a un posto de traballo de forma normalizada segue a ser un dos grandes retos das entidades que traballan a prol da inclusión laboral na empresa ordinaria. Campaña de concienciación Co obxectivo de concienciar á sociedade sobre o dereito a traballar das persoas coa síndrome de Down, a Federación Down España en colaboración coa Fundación Vodafone e a Fundación Atlético de Madrid, lanzou con motivo do Día Internacional do Traballo, a campaña “Yo me prep@ro”. O vídeo da campaña está protagonizado por  Filipe Luis, defensa titular do Atlético de Madrid, e por Pablo, un mozo coa síndrome de Down. Xuntos, piden oportunidades laborais para o colectivo de persoas coa síndrome de Down. Trátase de chamar a atención ante a escaseza de oportunidades coa que se encontran as persoas coa síndrome de Down no seu acceso ao mundo laboral e poñer en valor o seu esforzo e valía. “Yo estoy preparado” –afirma Pablo no spot, “¿Lo estás tú?- conclúe Filipe Luis, en alusión a que a sociedade debe dar unha oportunidade laboral a todas as persoas.      Vídeo “Yo me prep@ro”