O presidente do Comité de Entidades de Representantes de Persoas con Discapacidade en Galicia (CERMI Galicia), Anxo Queiruga Vila, compareceu esta mañá no Parlamento de Galicia con motivo da inauguración da Comisión non permanente de seguimento das políticas relativas á Discapacidade e elaboración de novas propostas a prol da integración das persoas con Discapacidade. O presidente do CERMI Galicia estivo acompañado da entidade Cogami. Esta comparecencia será a primeira das nove entidades restantes que integran o CERMI Galicia na actualidade: Fademga-Feaps, Faxpg, Once, Feafes Galicia, Down Galicia, Autismo Galicia, Fegadace, Fagal e Aspace Galicia. As comparecencias levaranse a cabo ao longo dos próximos meses e, en cada unha delas, a entidade membro representada polo seu presidente debullará as problemáticas que afectan ás Discapacidades que atenden nas súas Federacións. Nesta ocasión, o presidente do CERMI Galicia expuxo as políticas e maiores preocupacións que transversalmente afectan ao sector da Discapacidade na Comunidade. Entre outras, a falta de seguridade nas liñas de financiamento das entidades para os próximos anos, o risco de retrocesos nas políticas de discapacidade pola situación económica, o perigo manifesto de exclusión social do colectivo, a necesidade dun cambio nas políticas de emprego, e o recoñecemento das persoas con discapacidade como cidadáns de pleno dereito. Ademais, tamén se referiu á falta de accesibilidade en infraestruturas e comunicacións, ao incremento dos gastos en materia socio sanitaria para as persoas con discapacidade e á falta de coordinación das administracións e os prexuízos que isto causa ás persoas afectadas e ás súas familias, así como aos interrogantes do sector de cara á implantación eminente da LOMCE, e a plena inclusión educativa dos nenos e nenas con discapacidade conforme ao recollido na Convención da ONU.