Esta mañá presentouse na cidade de Vigo o proxecto “Yo me prep@ro”, un programa de formación en TIC para mozos e mozas coa síndrome de Down e discapacidade intelectual da provincia de Pontevedra, dirixido á inserción laboral en empresas ordinarias. O programa, que conta coa colaboración da Fundación Vodafone España, realizarase nas asociacións Down Vigo e Down Pontevedra “Xuntos” e del beneficiaranse máis de 50 persoas. O obxectivo do proxecto é proporcionar ás persoas coa síndrome de Down as ferramentas e estratexias necesarias para facilitarlles o acceso a un traballo, a través das diferentes tecnoloxías implantadas na sociedade: uso de Internet, do ordenador, acceso a redes bancarias informatizadas, comunicación a través da telefonía móbil ou fixa, realizar consultas en organismos públicos, programación e uso da televisión e DVD, etc. Proxecto a nivel nacional O programa de formación “Yo me prep@ro” é unha iniciativa de Down España e a Fundación Vodafone España que se desenvolve simultaneamente en 11 cidades españolas (Vigo, Pontevedra, Barcelona, Valencia, Granada, Málaga, Córdoba, Toledo, Castellón, Murcia e Pamplona) entre febreiro de 2014 e marzo de 2015. Este programa consta de dous niveis: un de iniciación e outro de profesionalización, ambos dun ano de duración. O nivel de profesionalización comprende tamén prácticas en contornos laborais cuxo obxectivo é conseguir a inserción laboral. No programa “Yo me prep@ro” participan un total de 240 alumnos con discapacidade intelectual de todo o país. Down España comprométese a insertar laboralmente ao 30% do total dos alumnos.