Down Galicia, como entidade representativa dun colectivo que leva máis de 15 anos loitando pola inclusión educativa de todas as persoas, vén de presentar unha serie de achegas ao borrador do decreto que regula a Formación Profesional Básica. As achegas refírense, fundamentalmente, á necesidade de que dito decreto recolla todas as medidas precisas para garantir que as persoas con dificultades de aprendizaxe non queden excluídas do sistema educativo ordinario. Unha circunstancia que se contempla na normativa internacional, nomeadamente na Convención Internacional dos Dereitos das Persoas con Discapacidade aprobado pola ONU, a cal se adheriu o Estado español no ano 2008. O Decreto polo que se regulan os aspectos específicos da formación profesional básica das ensinanzas da formación profesional dos sistema educativo en Galicia e se establecen vinte e un currículos de títulos profesionais básicos” será o decreto que regula as ensinanzas que substitúen aos programas de cualificación profesional inicial (PCPI), deseñados para aquel alumnado ao que lle custa obter o título da ESO. Principais achegas de Down Galicia ao borrador do decreto 1. Nos requisitos de acceso a FP Básica deben contemplarse as particularidades das persoas con necesidades educativas especiais (atendendo ao artº 23 R.D. Legislativo 1/2013 do 29 de novembro, polo que se aproba o Texto Refundido de la Ley General de derechos de las personas con discapacidad y de su inclusión social”), tal que;
- Non contemplar a idade como requisito de acceso ou establecelo coa máxima flexibilidade posible; os/as alumnos/as con necesidades educativas especiais (NEE) polo seu proceso de aprendizaxe e adquisición de coñecementos máis lento, por norma xeral rematan a ESO entre os 16 e 22 anos, polo que para garantír o seu dereito de acceso á FP Básica non se debería establecer tope máximo de idade para o acceso.
- Non contemplar como requisito de acceso a esixencia de ter cursado o 1º ciclo da ESO (1º, 2º e 3º ESO)
2. Requisitos de acceso; a nivel xeral para todo o alumnado de Galicia (teñan ou non NEE) proponse abrir a oferta de FP Básica sen límite máximo de idade, en réxime de adultos e oferta modular presencial (igual que existe nos ciclos de FP). Así ofreceríase a alternativa de acceder a un Título académico FP Básica, para adultos que quedan fóra dos estudos de Formación Profesional regrada porque non cumpren os requisitos de acceso a ciclos. 3. Aplicar as medidas de accesibilidade necesarias para o alumnado con NEE (artº 20 e 21 R.D. Legislativo 1/2013, do 29 de novembro, polo que se aproba o Texto Refundido de la Ley General de derechos de las personas con discapacidad y de su inclusión social”), entre as que como mínimo deben figurar;
- Flexibilización dos cursos de FP Básica na liña do regulado nos PCPI. Resulta necesaria unha flexibilización de cursos, contidos, materiais e actividades adaptándose plenamente ás necesidades do alumnado con NEE. Adaptacións de contidos, materiais, actividades,.. para aquel alumnado que o precise, sempre que se garanta a súa titulación e se axusten plenamente as adaptación ás necesidades do alumnado con NEE. Gran parte do alumnado con NEE, sen unha adaptación dos contidos, queda totalmente condenado ó fracaso, polo que se debe individualizar os obxectivos a conseguir con unha axeitada planificación e orientación. Ao mesmo tempo, debería incrementarse a duración da formación en centros de traballo (actualmente limitada a 130 h)
- Lectura fácil; contemplar esta metodoloxía de redacción accesible para os contidos, a realización de probas,..
- Profesorado de Apoio – Reforzo Educativo; que haxa profesorado de apoio debidamente cualificado, que entre as súas funcións teña a obriga de adaptar os contidos ás características específicas do seu alumnado, de realizar o seguimento dos aprendizaxes alcanzados e unha planificación clara dos obxectivos, e de proceder, coordinarse axeitadamente co resto de axentes que participan no plan de intervención do/a alumno/a con NEE (como por exemplo entidades de servizos sociais de atención a discapacidade)
4. Regular unha reserva de prazas para alumnos/as con NEE en cada especialidade; mínimo reserva de 2 prazas por curso, no caso dos cursos con maior demanda por parte de alumnado con NEE establecer una reserva mínima de 4 prazas por curso.
- Garantir unha ratio de alumnos/as en aula que permita unha formación e capacitación efectiva e eficaz; máximo 12 alumnos/as curso na liña do regulado nos PCPI; o contemplar un número superior de alumnos/as dificulta a aprendizaxe e a inclusión do alumnado con NEE (artº 18 R.D. Legislativo 1/2013).
5. Garantir un oferta de FP Básica que dea cobertura ao amplo territorio de Galicia chegando as zonas rurais con nivel de poboación considerable demandante de dita formación ou conseguir uns medios de transporte axeitados no suposto de que as persoas con discapacidade non teñan outra opción que desprazarse para conseguir formarse (artº 23 R.D. Legislativo 1/2013, do 29 de novembro, polo que se aproba o Texto Refundido de la Ley General de derechos de las personas con discapacidad y de su inclusión social” ) 6. Que a FP Básica na modalidade A alcance todos os centros en función das familias profesionais que teñan. 7. Garantir a inclusión educativa; referente á Disposición Adicional cuarta do Decreto 127/2014; “Otros programas formativos de formación profesional para los alumnos y las alumnas con necesidades educativas específicas”, en base á Convención da ONU sobre os Dereitos das persoas con Discapacidade que España ratificou estando en vigor no noso país desde o 2008: tal como recolle no seu artigo 24; “asegurar un sistema de educación inclusivo a todos os niveis” é imprescindible garantir a inclusión educativa do alumnado con discapacidade no sistema educativo, polo que resulta determinante definir axeitadamente esta formación, así como a titulación que se vai a obter por parte do alumnado con NEE nestes programas. 8. Articulo 23 Decreto 127/2014; avaliación na FP Básica: permitir un prazo máximo de permanencia superior para o alumnado con NEE coa opción de repetir cada un dos cursos unha segunda vez, igual que nos PCPI que contemplaban 2 cursos + 2 flexibilizacións + 1 repetición por curso o que supón un total máximo de permanencia de 6 anos.