A moza compostelá foi a encargada de dar lectura ao artigo 6 da Lei do Valedor do Pobo de Galicia, no que se recolle a imparcialidade desta institución respecto dos poderes públicos. Cristina Villar representou, coa súa participación neste acto, a diversidade da sociedade actual, así como o dereito de todas as persoas a participar de forma visible e autónoma no devir da súa propia comunidade. A institución do Valedor do Pobo de Galicia celebrou o seu XXX aniversario facendo fincapé na necesidade de seguir traballando a favor da transparencia, a coordinación con distintas entidades, os dereitos sociais e a conexión coa cidadanía. O Valedor, José Julio Fernández, durante a súa intervención apostou por analizar os procesos de coordinación con outras entidades, actualizar a normativa e a lexislación ao respecto, sofisticar os procedementos internos de traballo e ser rigorosos ante os riscos de politización. Tamén avogou por ir máis alá do Parlamento e chegar á opinión pública co obxectivo de responder aos retos que plantexa a cidadanía actual.