O programa de Atención temperá de Down Galicia, unha das metas do 3º Solidarios non stop de BBVA AM
Catorce proxectos de entidades prestadoras de servizos sociais de Galicia foron seleccionados pola Fundación Barrié e a Fundación Roviralta, que os financiarán cun total de 150.000 euros. Trátase da primeira convocatoria de proxectos impulsada conxuntamente por ambas entidades, e que foi creada para complementar os beneficios do programa Más Social. O obxectivo é facilitar apoio económico a proxectos sociais de entidades participantes en Más Social, un programa de fortalecemento do terceiro sector galego que a Fundación Barrié, en colaboración coa Fundación de PwC, desenvolve desde fai tres anos, e ao que se incorpora por primeira vez a Fundación Roviralta. Down Galicia, entidade participante na primeira edición de Más Social, participou nesta nova convocatoria cun proxecto denominado “Dinamización da base social; capacitación tecnolóxica”. O obxectivo será o de desenvolver accións de sensibilización, información e formación en capacitación tecnolóxica para persoas usuarias, familias e profesionais de seis entidades membro da Federación situadas en Santiago, A Coruña, Ferrol, Lugo, Ourense e Pontevedra. Perséguese evitar o ensanchamento da brecha dixital destas persoas, que están quedando á marxe do mundo tecnolóxico por razóns de idade, económicas, xeográficas e/ou de formación, así como garantir unha comunicación fluída e efectiva entre as entidades Down e a súa base social (persoas con discapacidade intelectual/síndrome de Down e as súas familias, profesionais e voluntarios). Más Social é un programa dirixido a entidades do Terceiro Sector e pretende promover un modelo de acción social economicamente sostible, que facilite a estas organizacións medios e estratexias para optimizar a súa xestión e orientalas cara ao futuro cun crecemento estable. Iniciado no 2011 como primeiro proxecto común entre as Fundacións Barrié e de PwC, Más Social converteuse xa nun modelo de referencia en canto ao apoio a estas entidades sociais, cun rol fundamental na atención aos colectivos máis vulnerables.
Entradas relacionadas
