O presidente da Asociación Down Vigo, Fernando Molina, presidiu esta tarde a solta simbólica de globos coa que a entidade conmemora os seus 25 anos de actividade ininterrompida. Desta forma, a través das cores corporativas, azul y amarelo, quixeron simbolizar unha serie de conceptos relacionados coas capacidades das persoas con síndrome de Down, cos seus dereitos e coa súa vontade de vivir unha vida normalizada. O presidente, estivo acompañado por Ruth Ramos Núñez, membro de Down Vigo e vocal na Xunta Directiva da Federación Down España. Ruth é a primeira persoa coa síndrome de Down que forma parte da Xunta Directiva da federación española, tras a asemblea celebrada o pasado mes de abril. Na súa intervención animou aos asistentes ao acto a “traballar xuntos para que teñamos igualdade de oportunidades, recursos para poder competir laboralmente, recursos para que os nenos e nenas con discapacidade non se sintan excluídos das aulas, e recursos para que os nosos profesores poidan exercer o seu traballo con unhas condicións dignas”. Pola súa parte, Fernando Molina quixo destacar que “sempre pensamos firmemente que os nosos fillos e fillas, contando cos apoios adecuados, son tan capaces como calquera outra persoa para facerse cargo das súas vidas. A día de hoxe, 25 anos despois de comezar a nosa andadura, xa temos exemplos significativos das súas capacidades”. Molina referiuse aos mozos e mozas que contan con postos de traballo, algúns deles estables, aos que xa viven fóra do fogar familiar en vivendas independentes, e aos que día a día se esforzan por superar as barreiras que a sociedade a veces lles impón. Aproveitou ademais para dar as grazas a todas as persoas e organismos, públicos e privados, que ao longo destas dúas décadas e media apoiaron a Down Vigo e contribuíron á inclusión social e laboral dos seus usuarios e usuarias. Este acto, con marcado carácter festivo e reivindicativo, celebrouse na Praza da Princesa, e nel participaron as familias socias de Down Vigo, o equipo profesional, e numerosas personalidades do mundo da cultura, o deporte e a política. Previamente, o alcalde da cidade, Abel Caballero, presidiu a inauguración da exposición Identidades. O Proyecto Identidades “Identidades” é o resultado da colaboración entre un grupo de 16 mozos e mozas de Down Vigo e do grupo de deseñadores La Boîte Is. Entre todos, e seguindo a metodoloxía de Aprendizaxe Cooperativa, conseguen realizar unha colección de xoias e roupa inspiradas na natureza salvaxe, polo que a titulan “Selvatics”. Unha exposición que non só amosa a capacidade das persoas coa síndrome de Down e discapacidade intelectual para desenvolver a súa creatividade, senón que reivindica a importancia de defender la liberdade individual dentro dunha sociedade en constante cambio. Neste sentido, Lara Paula Gómez, unha das creadoras da colección, afirmou que  “para nós Identidades supón unha demostración do que podemos chegar a facer. A nosa discapacidade non é máis que unha compañeira de viaxe. Estamos cansados dos sorrisos condescendentes. Queremos que eses sorrisos sexan de admiración polo que aportamos á nosa sociedade”. A exposición poderá visitarse na Casa Galega da Cultura ata o día 28 de setembro. Down Vigo Down Vigo nace no ano 1989 cando un grupo de pais e nais de nenos e nenas con síndrome de Down decide unirse para loitar por un modelo de vida que non existía por aquel entonces. O seu principal obxectivo era que os seus fillos e fillas non fosen discriminados por causa da súa discapacidade, senón que puidesen optar ás mesmas escolas, postos de traballo e actividades de ocio que calquera outra persoa. Así, Down Vigo é a primeira entidade de referencia que presta  o servizo da promoción autonomía persoal (SEPAP) que, a grandes trazos, consiste en crear un sistema de apoios para que a persoa coa síndrome de Down desenvolva ao máximo as súas capacidades desde que nace ata que envellece. Un programa que contempla todas as etapas vitais, desde a atención temperá, a educación inclusiva, a formación para o emprego, a inserción laboral, a vida adulta e independente, o envellecemento activo, o ocio, a educación afectivo-sexual, etc. Fai 25 anos, Down Vigo se constitúese con 18 socios e actualmente conta con 162. No ano 2003, amplía os seus servizos e ademais de persoas coa síndrome de Down, presta apoio a persoas con discapacidade intelectual.