O Movemento Down crea unha campaña para acabar cos prexuízos existentes contra o colectivo
“O traballo apórtame enerxía e felicidade e permíteme demostrar que podo facer ben as cousas. Eu animo aos empresarios a que nos contraten”. Con esta frase resumiu Pamela Casagrande, moza coa síndrome de Down, a súa experiencia no mercado laboral no acto celebrado na Cámara de Comercio de Santiago, durante o que a Fundación Mapfre presentou o programa Juntos Somos Capaces. Ramón Salgado, xerente de Limpiezas Salgado, empresa que ten contratadas a Pamela Casagrande e a Rocío Torres, explicou a súa experiencia e destacou a perfecta integración de ambas traballadoras co resto do equipo e “a súa capacidade para realizar todas as tarefas que se lle encomendan”. Salgado destacou o apoio das técnicos de emprego de Down Compostela para “conseguir que a inserción laboral destas dúas mulleres con discapacidade teña sido un éxito”, desde que decidiu a contratar de forma indefinida a ambas mozas. O presidente da Cámara de Comercio, Jesús Asorey, destacou o apoio que desde a institución que representa se presta “a iniciativas que teñen por obxectivo incorporar ao mercado laboral a persoas con discapacidade” para reducir unha taxa de paro próxima ao 80 por cento neste colectivo. Pola súa banda, Juan Martínez, presidente de Down Compostela, animou aos empresarios presentes na sala a “dar unha oportunidade ás persoas con discapacidade para que se poidan incorporar ao mercado laboral”, para o que contarán co apoio tanto de Down Compostela como do programa Juntos Somos Capaces da Fundación Mapfre. Raúl Pardo, de Fundación Mapfre, agradeceu a asistencia aos empresarios que acudiron a coñecer o programa convocados pola Cámara de Comercio, e recordou que as empresas que se adhiran ao programa Juntos Somos Capaces “recibirán o apoio e o seguimento necesario por parte de profesionais especializados de entidades como Down Galicia e Down Compostela”. Á convocatoria asistiron empresarios do sector da limpeza, artes gráficas e hoteis, ademais de representantes da Asociación de Empresarios do Polígono do Tambre e da Asociación de Hostelería de Santiago.
Entradas relacionadas
