“As persoas con discapacidade intelectual teñen as mesmas necesidades de orientación académica e profesional que o resto”
O Museo Interactivo da Historia de Lugo acolle ata o vindeiro 30 de novembro a exposición ‘As persoas con discapacidade na vida cotiá”. A mostra, organizada pola Fundación Grupo Norte e o Instituto Universitario para la Integración en la Comunidad (Inico) coa colaboración de Down Lugo e o Concello de Lugo, está formada por 55 fotografías que permiten coñecer e entender a realidade das persoas con discapacidade desde a perspectiva dos seus propios protagonistas. A intención consiste en ofrecer imaxes positivas que permitan a reflexión, empatía e identificación co mundo da discapacidade. As instantáneas forman parte dunha selección específica realizada para a ocasión entre os mellores traballos presentados ao Concurso Internacional de Fotografía Dixital organizado desde o ano 2003 pola Fundación Grupo Norte e INICO e que recibe anualmente máis dun millar de fotografías procedentes de todo o mundo. A exposición foi inaugurada polo presidente da Fundación Grupo Norte, Javier Ojeda, a concelleira de Cultura de Lugo, Carmen Basadre, e a presidenta de Down Lugo, María José Blanco. Javier Ojeda destacou na súa intervención que a mostra está composta por “fotografías que propoñen enfoques adecuados ás realidades humanas e que promoven indicadores sociais relativos á verdadeira integración, pero tamén falan de superación e normalidade”. Unha idea na que tamén incidiu Carmen Basadre afirmando “que estamos ante unha realidade que podemos encontrar no noso día a día, na nosa propia comunidade, e á que debemos prestar atención e atender baixo parámetros de normalidade”. Pola súa parte, María José Blanco fixo fincapé en que “é unha moi boa oportunidade para sensibilizar e concienciar á opinión pública sobre a capacidade de superación dos protagonistas, e sobre a necesidade de seguir fomentando a igualdade de oportunidades e de educar en valores como a tolerancia e a diversidade social. Este proxecto tamén nos axuda a loitar contra a invisibilidade das persoas con dificultades e nos sitúa na posición de poder comprender as barreiras ás que deben facer fronte no seu día a día”.
Entradas relacionadas
