O proxecto “Capacitadas. Formación integral de nenas coa Síndrome de Down”, da Fundación Down Compostela, foi un dos galardoados en Galicia con 10.000 euros nos Premios Territorios Solidarios convocados por BBVA, e que se entregaron no Museo Nacional de Ciencia e Tecnoloxía da Coruña. “Capacitadas. Formación integral de nenas coa Síndrome de Down” abarca unha formación integral, no ámbito educativo e social, para que as nenas e mozas coa Síndrome de Down e discapacidade intelectual que acoden a colexios ordinarios “poidan acadar un maior grao de autonomía cando se convertan en mulleres e poidan achegar o seu gran de arena a esta sociedade na que vivimos”, como explicou o presidente da Fundación, Juan Martínez. Na entrega dos premios, Martínez estivo acompañado pola directora da Fundación, Marta Rodríguez, e polos mozos Cristina Villar e Álvaro Díez, que colaboraron na entrega dos premios. Juan Martínez, explicou que o proxecto galardoado vai permitir colaborar coa integración escolar de 23 nenas e mozas, de entre 4 e 19 anos, que acoden a vinte centros ordinarios. “Desde Down Compostela, e en coordinación cos colexios, complementamos a formación que reciben nos centros, nas áreas de logopedia, lecto-escritura, psicomotricidade, novas tecnoloxías ou autonomía para que estas alumnas se convertan en mulleres adultas coas mesmas oportunidades que os demais. É un proxecto a medio prazo co que, desde a Fundación, queremos contribuír ao cumprimento da Convención de Dereitos das Persoas con Discapacidade que aprobou Nacións Unidas e que foi ratificada por España”. O director da territorial noroeste do BBVA, Juan Carlos Hidalgo, explicou que Territorios Solidarios é “unha iniciativa dirixida a persoas que persegue apoiar proxectos sociais”, que permite “descubrir o lado máis humano” con colaboración e talento orientado a axudar aos que máis o necesitan. Os empregados de BBVA son os que deciden que proxectos da súa contorna apadriñan e presentan á convocatoria e, a través dos seus votos, a cales deles se destinan as axudas.