“Persoas Marabillosas” é o título do Calendario Solidario 2015, co que Down Compostela rende homenaxe ás persoas coa Síndrome de Down e discapacidade intelectual que sorprenden a diario co seu esforzo e os seus logros e tamén a todas aquelas que, dunha ou outra forma, lles axudan nalgún momento a realizar o seu proxecto de vida. O calendario, que se realizou en colaboración con Carrefour Santiago, “contribúe a facer máis visible o papel que xogan nesta sociedade diversa as persoas con discapacidade e tamén a recadar fondos para manter o programa de actividades da Fundación co que axudamos a 105 persoas coa Síndrome de Down e discapacidade intelectual”, explicou o presidente da entidade, Juan Martínez, durante a súa presentación. Editáronse 2.000 exemplares, en formato de mesa e de parede, que se poden adquirir por 5 euros, tanto nas instalacións de Down Compostela como no hipermercado Carrefour do Centro Comercial As Cancelas. Juan Martínez agradeceu a colaboración da dirección de “Carrefour Santiago, por ofrecernos a posibilidade de realizar este proxecto nas súas instalacións”, e a de Jorge Luis González Gestoso, o autor das doce fotografías que ilustran cada un dos meses. Martínez tamén destacou o intenso traballo realizado por María José Copano nesta iniciativa e a colaboración dos voluntarios da Fundación Solidaridad Carrefour e dos traballadores do hipermercado de Santiago que, xunto con algúns dos seus fillos, aparecen nas fotografías. As doce fotos do calendario amosan situacións cotiás na vida de calquera persoa e no proceso de compra dunha familia. Así, vense a nenos e nenas na peixería xunto a un boneco de xeo no mes de xaneiro, mozos e mozas elixindo a carne en febreiro,  lucindo paraugas en abril ou ramos de flores en maio. Os xogos coas pelotas de praia en agosto, ou escollendo libros en setembro son outros dos motivos do calendario, que reserva o mes de decembre á típica elección dos agasallos para Nadal e Reis.