A erradicación da educación especial e a regulación dun período de transición entre o actual modelo integrador e un totalmente inclusivo, foi a primeira demanda de Down Galicia en materia de educación perante a Comisión non Permanente para o seguimento das políticas relativas á discapacidade. O presidente da Federación, Delmiro Prieto, defendeu a necesidade de construír, desde unha idade temperá e no ámbito escolar, unha sociedade tolerante e respectuosa coa diferenza e coa diversidade, na que non ten cabida a segregación, senón a inclusión como ferramenta de enriquecemento desde a infancia. Neste sentido, tamén solicitou que se regule adecuadamente a atención á diversidade do alumnado por parte do Goberno galego, e que o Parlamento solicite a derrogación da LOMCE por non garantir a educación inclusiva con apoios para alumnado con necesidade específicas, á que obriga a Constitución e os tratados internacionais de dereitos humanos ratificados por España e pola Cámara galega. Por último, no ámbito da educación, solicitou que mentres a LOMCE estea vixente, non se aplique a parte na que a decisión última para elixir o tipo de centro escolar, ordinario ou especial, corresponde á Administración educativa, posto que supón unha vulneración evidente da liberdade de opción que a Convención de Nacións Unidas sobre os Dereitos das Persoas con Discapacidade recoñece a toda persoa con discapacidade en calquera ámbito. Outras demandas No ámbito do emprego, Down Galicia reclamou máis investimento público en apoios para fomentar o acceso ao emprego das persoas con discapacidade na empresa ordinaria. Prieto afirmou que, neste campo, vénse detectando que as Administracións públicas, que son as que promoven a Lei tamén son as primeiras en incumprila, polo que solicitou que contemplen na función pública ás persoas con discapacidade, a través de convocatorias adaptadas e fomentando a súa contratación. En Dependencia e Carteira de Servizos Sociais demandou que se adapten as valoracións á discapacidade intelectual posto que, na maior medida están orientadas á discapacidade física, e producen desaxustes importantes entre as valoracións e a realidade das persoas valoradas. Na comparecencia, Prieto tamén solicitou que se desenvolva a regulación dunha Rede Galega de Atención Temperá en Galicia, que inclúa os servizos prestados nesta área por Down Galicia. Por último, referiuse á necesidade de formular un novo sistema de apoios á capacidade de obrar das persoas con discapacidade intelectual que eviten a súa incapacitación legal; así como ao Anteproxecto de Lei de Subvencións, no que solicitou que se eliminen aspectos totalmente nocivos para as entidades do terceiro sector social, como a obriga do cofinanciamento das axudas públicas.