No último mes do exercicio 2014, un total de 12 persoas coa síndrome de Down e discapacidade intelectual das entidades Down en Galicia, accederon a un posto de traballo ou melloraron as condicións contractuais do que xa tiñan en empresas ordinarias da súa contorna. Así, en Pontevedra contabilizáronse 4 insercións laborais. David, un mozo con discapacidade intelectual vén de asinar un contrato con McDonals para realizar tarefas de axudante de cociña e sala, tras superar un período de prácticas no que amosou as súas capacidades e competencias. Na mesma cidade, Víctor e Diego acadaron sendos postos de traballo como mozos de almacén en Distribuciones Froiz para a elaboración de cestas e lotes de Nadal. A cuarta inserción laboral é a de Adrián que, durante dous meses e medio, desempeñará o posto auxiliar administrativo no Concello de Pontevedra, a través da asistencia técnica da empresa Iternativa. En Ferrol, Cistóbal vén de asinar un contrato como auxiliar de mantemento e servizos no Grand Hotel de Ferrol, cunha duración dun ano. Tamén de duración anual son os contratos de Adrián e Juan Carlos para desempeñar postos de mantedor de instalacións deportivas, concretamente no Multiusos Fontes do Sar, en Santiago de Compostela. En Ourense, José Manuel e Adrián desempeñarán postos de ordenanza durante seis meses en instalacións do Campus de Ourense, concretamente no edificio xurídico social e no polideportivo. Mentres en Lugo, A Coruña e Vigo contabilízaronse sendas insercións en Decathlon. En Lugo é  Francisco o que acaba de entrar na plantilla de Decathlon desta cidade por un período de 3 meses con posibilidade de continuidade. Na Coruña, Laura tamén asinou un contrato por un período de 3 meses con de continuidade. En Decathlon Vigo, foi contratada Romina tamén por tres meses. Nesta cidade, Decathlón ten contratadas ademais a tres persoas máis, a Nerea, que conta cun contrato indefinido desde 2013, a Sergio que se incorporara á plantilla en xullo e a de Esther cuxa contratación temporal por un período de seis meses vén de ser renovada cun contrato indefinido. Concretamente na cidade de Vigo, a relación entre Down Vigo e Decathlon ten unha longa traxectoria de colaboración que comezou desde o mesmo momento da inauguración da tenda, no ano 2009, con 3 insercións laborais. Desde entón, e ata a acutalidade, foron 26 as persoas de Down Vigo contratadas. Cabe lembrar que estas insercións laborais son posibles grazas ao servizo de Emprego con Apoio que en Galicia levan a cabo todas as entidades Down desde o ano 2.002. O servizo, que mantén bos resultados de inserción a pesar da crise, está orientado a facilitar que as persoas con discapacidade teñan un traballo en empresas ordinarias. Para que estas insercións sexan efectivas cóntase coa figura dun preparador ou preparadora laboral (profesional que se encarga de ensinar as tarefas á persoa con discapacidade no  posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas súas tarefas. É preciso resaltar que a participación, e cada vez maior presenza, das persoas con discapacidade intelectual e síndrome de Down nas empresas ordinarias contribúe de forma eficaz a desterrar os tópicos que tradicionalmente se lles atribúen, resultando un modo sumamente eficaz de inclusión social. Contribúe, así mesmo, a propiciar un cambio de visión, de persoa con discapacidade a traballador ou traballadora, constatándose unha importante implicación dos compañeiros e compañeiras de traballo na aceptación da diversidade.