Cunha achega de 2.000€, a Deputación de Pontevedra continúa colaborando co proxecto de “Emprego con Apoio” que pon en marcha Down Galicia a través das súas entidades membro na provincia de Pontevedra. Esta colaboración permitiu que un total de 76 persoas con discapacidade intelectual, en particular coa síndrome de Down, contaran cunha serie de apoios encamiñados a conseguir a súa inclusión no mercado laboral ordinario durante o ano 2014. Esta axuda económica permitiu prestar apoios a persoas de toda a provincia, especialmente na capital e nas cidades e concellos máis importantes, aínda que tamén naquelas áreas xeográficas ás que pertencen os usuarios e usurarias do servizo de emprego. Na área de influencia de Pontevedra, ademais da propia cidade do Lérez pódense citar Redondela, Cambados, Sanxenxo, Pontecaldelas, Marín e Poio. Mentres, na área de Vigo, amais da cidade olívica, estarían Baiona, Mos, Tomiño, Redondela, Ponteareas, Cangas e Moaña. Cabe lembrar que o proxecto de Emprego con Apoio foi posto en marcha no ano 2.002 e, desde entón, mantén bos resultados de inserción a pesar da crise. Fundamentalmente está orientado a facilitar que as persoas con discapacidade teñan un traballo en empresas ordinarias. Para que estas insercións sexan efectivas cóntase coa figura dun preparador ou preparadora laboral (profesional que se encarga de ensinar as tarefas á persoa con discapacidade no  posto de traballo), e que non supón custe algún para a empresa. Este tipo de apoio no posto é gradual e vaise retirando ata desaparecer por completo a medida que a persoa con discapacidade vai adquirindo autonomía nas súas tarefas.