Down Galicia e Clece alíanse para promover a inclusión laboral das persoas con discapacidade intelectual
A Deputación da Coruña destinou, no ano 2014, unha achega de 3.497,93 euros ao Proxecto “Aulas interactivas para persoas coa síndrome de Down”, co fin último de facilitar o uso de ferramentas audiovisuais para optimizar os procesos de ensino e aprendizaxe das persoas coa síndrome de Down e con discapacidade intelectual. Grazas a esta achega adquiriuse novo equipamento para completar as aulas interactivas das entidades Down en Ferrol, A Coruña e Santiago de Compostela. Con este recurso prestouse apoio educativo a 75 persoas coa síndrome de Down ou discapacidade intelectual de idades comprendidas entre os 3 e os 18 anos e escolarizadas en diferentes etapas educativas nas áreas xeográficas da provincia de A Coruña. Cabe destacar que o alumnado coa síndrome de Down aprende todo o que se lle ensina con estratexias metodolóxicas axustadas ao seu estilo de aprendizaxe. Está demostrado que lles resulta máis sinxelo aprender se a información lles chega por medio da vista que por medio do oído, porque xeralmente as persoas con Síndrome de Down presentan déficit auditivo de tipo condutivo, o que lles produce dificultades de percepción auditiva e de memoria a curto prazo. As Novas Tecnoloxías facilitan as posibilidades de percepción e procesamento da información por vía visual e reforzan a auditiva. O seu uso é fundamental, porque o ensino débese apoiar nos trazos menos deficitarios para conseguir melloras na aprendizaxe. Ademais, o uso do ordenador e os medios audiovisuais facilitan a individualización da intervención, xa que estes materiais ofrecen grande versatilidade e flexibilidade, o que permite adaptarse ás características da persoa. Asemade contribúe a contrarrestar as dificultades derivadas da motivación e a fatiga.
Entradas relacionadas
