O traballo no campo da investigación sanitaria e a atención clínica, a aposta pola inclusión escolar e a incorporación ao mercado laboral das persoas con discapacidade foron os méritos que o Padroado da Fundación Down Compostela tivo en conta para entregar a Pedro Diz, ao Instituto de Secundaria As Fontiñas de Santiago, e a Limpiezas Salgado os Premios Down Compostela 2015, que se entregarán o vindeiro 18 de marzo no Hostal dos Reis Católicos. Con estes galardóns, a Fundación quere conmemorar o Día Mundial da Síndrome de Down, que se celebra oficialmente o 21 de marzo. Os motivos que tivo en conta o Padroado para conceder os premios e os galardoados foron os seguintes: Pedro Diz Dios, catedrático de Estomatoloxía da Universidade de Santiago de Compostela e Director da Unidade de Pacientes Especiais da Facultade de Medicina e Odontoloxía. Merece o premio pola súa actividade e esforzos para mellorar a saúde e hixiene bucodental de persoas con discapacidade, tanto a través da docencia, como da investigación e a atención clínica. Foi o promotor, fai máis de 20 anos, da unidade que atende a doentes coa síndrome de Down e discapacidade procedentes de toda Galicia, que é referente a nivel nacional e internacional. En outubro de 2012 Pedro Diz coordinou a edición do “Manual de hixiene bucal para persoas con discapacidade”, unha iniciativa pioneira no seu ámbito que contén información útil para profesionais, familiares e pais e nais. Instituto de Educación Secundaria (IES) As Fontiñas. Polo seu labor a favor da inclusión escolar das persoas con discapacidade intelectual. A convicción e a implicación de todo o centro, desde o seu director, Juan José Hombre Eiras, e o resto do equipo directivo, a orientadora, o profesorado e o persoal auxiliar e de administración, ata os propios estudantes, contribúen a que os alumnos con discapacidade que cursan ciclos de Formación Profesional nel se sintan como un máis. E isto sen minguar o nivel de esixencia académica. Destaca o enfoque positivo que o IES As Fontiñas dá á ensinanza de alumnos con necesidades educativas especiais, centrándose nas súas capacidades e tratando de desenvolvelas ao máximo. Limpiezas Salgado. Polo seu firme mozas do Programa de Emprego con Apoio que desenvolve a Fundación Down Compostela. Coa aposta decidida do seu director xeral, Ramón Salgado, e de todo o persoal, Limpiezas Salgado contribúe a facer visibles as capacidades das persoas coa síndrome de Down e discapacidade intelectual, axudándolles a realizar os seus proxectos persoais e a conseguir a súa inclusión na sociedade.