Excelentes resultados dos mozos e mozas de entidades Down nas probas de Competencias Clave
Un mozo de Down Lugo está a participar no proxecto “Lugo Emprego Activo 2” que desenvolve o Concello desta cidade e que conta co cofinanciamento do Fondo Social Europeo. Asiste a unha acción formativa sobre “Operacións básicas de catering” de 400 horas, das cales 100 corresponden a prácticas formativas en empresas do sector. Estas prácticas formativas está previsto que comecen a finais do mes de abril. Para participar neste proxecto, todas as persoas participantes tiveron que tomar parte nun proceso de selección no que debían defender tanto a súa vontade como os seus motivos para participar no mesmo. Debían manifestar, ademais, o seu interese na busca activa de emprego así como a súa disposición para finalizar o itinerario formativo ao que optaban. Este mozo de Down Lugo, de 25 anos de idade, ten discapacidade intelectual e xa contaba con formación relacionada, tras realizar dous cursos de “Operacións básicas de restaurante bar”, e de “Operacións básicas de cociña”. Deste xeito, coa acción formativa na que está a participar a través deste proxecto, avanzará na súa formación nas áreas relacionadas coa hostalería. Esta acción formativa comezou a finais do mes de xaneiro e está previsto que remate a finais de maio, e forma parte dun plan integral posto en marcha polo Concello de Lugo para promover a empregabilidade de persoas con maiores dificultades para acceder ao mercado laboral. Ademais da parte formativa, as persoas participantes dispoñen de unha orientación personalizada e dun seguimento continuado por parte dos profesionais do proxecto.
Entradas relacionadas
