Down Vigo e a empresa de automoción Magna Seating asinan un convenio de colaboración para facilitar a inclusión laboral do colectivo
Un ano despois de presentar publicamente o proxecto “Identidades-Selvatic”, Down Vigo poralle o broche de ouro cun desfile que formará parte dunha gala benéfica que terá lugar o sábado 25 de abril ás 21 horas no Casino La Toja. O proxecto “Identidades-Selvatic” nace da colaboración dun grupo de 16 mozos e mozas de Down Vigo e o grupo de deseñadores “La Boite Is”, que a través dunha serie de obradoiros semanais lle foron dando forma a unha colección de roupa e xoias. Un traballo que nacía co obxectivo de reivindicar a creatividade e a capacidade de traballo das persoas coa síndrome de Down e discapacidade intelectual, e que fora exposto ao longo de todo o ano pasado para conmemorar o XXV aniversario da Asociación Down Vigo. De feito, a exposición “Identidades-Selvatic” fora amosada publicamente por primeira vez o Día Mundial da Síndrome de Down de 2014 –o 21 de marzo- en Ferrol, onde todas as entidades Down de Galicia celebraran esta data tan emblemática para o colectivo de persoas que representan. Posteriormente, no mes de xullo, fora exposta no Centro Comercial Coruña The Style Outlets, e no mes de setembro, con motivo da celebración oficial do XXV aniversario de Down Vigo expuxérase na Casa da Cultura Galega da cidade olívica. En palabras de Miguel Estévez, técnico de Down Vigo que supervisou a marcha deste proxecto, “Identidades pon de relevo a importancia de defender a liberdade individual dentro dunha sociedade en constante cambio. Independentemente de ter unha discapacidade ou non, todos somos cidadáns con capacidade para aportar á nosa sociedade aqueles elementos que contribúan á súa evolución positiva”.
Entradas relacionadas
