Este verán colabora con Down Galicia a través das túas compras online
Durante o exercicio 2014, un total de 123 persoas coa síndrome de Down e/ou discapacidade intelectual contaron polo menos cun contrato de traballo ou cunha práctica laboral. Este dato supón que o 77,8% das persoas que participan no programa de emprego con apoio das entidades Down en Galicia tivo acceso a un posto de traballo nese período. Porén, o principal atranco para o colectivo de persoas con discapacidade intelectual segue a ser a inestabilidade e a temporalidade nas contratacións. Así, no ano 2014 no marco do programa de emprego con apoio, asináronse un total de 139 contratos e 55 prácticas laborais –aos que accederon estas 123 persoas- o que pon de manifesto a curta duración das contratacións en moitos dos casos. As persoas participantes no programa reciben unha formación e unha preparación laboral que lles permite desempeñar os postos de traballo máis acaídos segundo as capacidades de cada quen. Os seus perfís laborais máis habituais son os relativos ao sector servizos -principalmente hostalaría e comercio-, e o sector de administración e oficinas. Aínda que nos últimos anos, Down Galicia mantén a taxa de persoas activas no seu programa de emprego no 80%, o certo é que o acceso a un posto de traballo de forma normalizada e a falta de oportunidades seguen a ser os grandes retos das entidades que traballan a prol da inclusión laboral na empresa ordinaria. O dereito ao traballo é unha reivindicación histórica das persoas coa síndrome de Down e discapacidade intelectual, que foi recollido no 2006 pola ONU na Convención Internacional sobre Dereitos de Persoas con Discapacidade da ONU –ratificada polo Estado español o 3 de maio de 2008-, e que no seu artigo 27 recoñece “o dereito das persoas con discapacidade a traballar en igualdade de condicións coas demais, a condicións de traballo xustas e favorables, e en particular a igualdade de oportunidades”. Con respecto á empresa ordinaria, dáse a circunstancia de que en España se está incumprindo coa cota de inserción laboral fixado pola Lei Xeral de Discapacidade (antiga LISMI), que obriga ás empresas de máis de 50 traballadores a que reserven un 2% dos seus postos de traballo a persoas con algún tipo de discapacidade. Segundo os últimos datos feitos públicos a nivel estatal, a taxa de incumprimento desta lei por parte das empresas sitúase no 67%. En canto ao emprego público, a nivel estatal convocáronse oposicións en quenda única e independente para persoas con discapacidade intelectual por primeira vez no ano 2012, co obxecto de cubrir 54 prazas de persoal laboral fixo como Axudante de Xestión e Servizos Comúns, das que 3 correspondían á Comunidade galega, 2 na provincia da Coruña e 1 na de Lugo. Daquela, fóra un mozo de Down Lugo o que acadaba a praza na provincia luguesa. A nivel autonómico, e tras anos de demandas por parte das entidades Down, o executivo galego vén de aprobar na oferta de emprego público, correspondente a prazas de persoal funcionario e laboral para o ano 2015, unha reserva de 6 prazas para o posto de ordenanza ás que só poderán presentarse persoas con discapacidade intelectual.
Entradas relacionadas
