Un total de 17 persoas das entidades Down en Pontevedra e Vigo presentaranse mañá, martes 12 de maio, á proba para bolsa de emprego da Deputación de Pontevedra para contratacións temporais. Trátase dunha convocatoria que contempla entre os postos ofertados, a categoría de Ordenanza reservado para persoas con discapacidade intelectual, grupo E, sendo a primeira vez que a Deputación provincial convoca postos na súa bolsa de emprego especificamente para persoas con discapacidade intelectual. O exame celebrarase no Centro Príncipe Felipe e comezará ás 09:00 horas, e están admitidas un total de 53 persoas. De Down Vigo concorren 9 persoas e de Down Pontevedra “Xuntos” concorren 8 persoas, algunhas delas xa con experiencia en probas de convocatorias públicas. Aínda que é a primeira vez que a Deputación de Pontevedra contempla postos específicos para persoas con discapacidade intelectual na súa bolsa de emprego, xa no ano 2013 convocara unha oposición para ordenanza en quenda única e independente para este colectivo. As convocatorias en quenda única e independente para persoas con discapacidade intelectual é unha reivindicación histórica das entidades que representan a este colectivo, por considerar que cada tipo de discapacidade ten unhas particularidades propias, e que as adaptacións nas probas de acceso deben ser específicas para cada grupo, xa que non é posible unha equiparación real de oportunidades de non terse en conta as diferenzas de partida.