As máis de 400 persoas que se deron cita no II Encontro de Familias organizado por Down Galicia puideron coñecer de primeira man a próxima comercialización dun complemento alimenticio que contén epigalocatequina galato (EGCG), unha sustancia natural presente no té verde que mellora a capacidade cognitiva das persoas coa Síndrome de Down. Baixo o nome de FontUp chegará ás farmacias españolas a mediados do mes de xuño. Este produto é froito da investigación clínica desenvolvida dende 2009 por Mara Diersen, do Centro de Regulación Genómica de Barcelona e presidenta da Sociedad Española de Neurociencia, e Rafael de la Torre, do Instituto de Investigación del Hospital del Mar de Investigacións  Médicas de Barcelona, quen onte presentou os resultados preliminares deste estudo, no que participaron máis de 100 adultos coa Síndrome de Down. A EGCG foi identificada no ano 2003 como un potente inhibidor da actividade enzimática do xene que causa o deterioro cognitivo das persoas coa síndrome de Down. A partires do ano 2009 iníciase a investigación de Dierssen e De la Torre, que evidencia que as persoas que seguiron unha suplementación de EGCG combinada con estimulación cognitiva melloran a súa capacidade de aprendizaxe. Nos estudos en seres humanos participaron, en diferentes fases clínicas e preclínicas, 117 persoas coa síndrome de Down de 16 a 34 anos, nos que se foron comparando os resultados tras a administración de suplementos de EGC. As conclusión provisionais dos investigadores sinalan que o tratamento con EGCG mellora a plasticidade sináptica cerebral das persoas coa síndrome de Down, o que se traduce nunha mellora de certas formas de memoria, nas funcións executivas e na súa competencia na vida diaria. Dúas doses diarias A raíz desta investigación, Laboratorios Grand Fontaine desenvolveu un produto, chamado FontUP, que chegará ás farmacias españolas a mediados de xuño como complemento alimenticio, sen glute e sen lactosa, para disolver en auga. No Encontro de Familias de  Down Galicia, a directora de marketing de Grand Fontaine, Beñola Urbierna, explicou que o FontUP é unha bebida instantánea en po con extracto de té verde e rica en fibra, que contén unha cantidade estandarizada de EGCG. O tratamento consistirá en dúas tomas diarias, unha pola mañá e outra pola noite. O custo estimado é de 22 euros semanais. Tanto Rafael de la Torre como Begoña Urbierna destacaron que o tratamento está recomendado para maiores de 16 anos, ao tempo que recomendaron a todas as familias e persoas con Síndrome de Down que desexen tomar o FontUp, que antes de iniciar o tratamento acudan ao seu médico de cabeceira. Agustín Huete e os retos do futuro Antes da presentación deste estudo, II Encontro de Familias de Down Galicia comezou cunha conferencia de Agustín Huete, profesor da Universidad de Salamanca, que presentou a actualidade da poboación coa síndrome de Down, a súa realidade demográfica e as cifras relativas á súa inclusión social. Na súa intervención, Huete analizou e propuxo unha reflexión sobre as circunstancias e retos aos que deben facer fronte as familias, profesionais e institucións que representan ás persoas coa síndrome de Down.