Preto de 20 empresas que desenvolven a súa actividade nas Rías Baixas asistiron hoxe en Sanxenxo a un encontro empresarial organizado pola Fundación Mapfre que serviu como presentación do programa “Juntos Somos Capaces”. Trátase dun proxecto para promover a inclusión laboral de persoas con discapacidade intelectual e enfermidade mental e que desde 2010 facilitou a formación e a integración laboral de 1.600 persoas en España. Durante o encontro, que foi posible grazas ao apoio do Real Club Náutico de Sanxenxo, a Xunta de Galicia, a Deputación de Pontevedra, Turismo Rías Baixas, así como a Down Galicia e FEAFES Galicia, convidouse ás empresas, entre elas Termas de Cuntis e Espazo Do Lector, a que participen en dito programa, facilitando a estas persoas, en risco de exclusión social e en situación de desemprego de longa duración, prácticas laborais coas que obteñan máis oportunidades profesionais no futuro. Neste contexto, Ángeles Sabarís Villar e Carmen García Solla, membros de Down Pontevedra – Xuntos e traballadoras de Termas de Cuntis desde 2001 e 2014 respectivamente, explicaron ante os asistentes as súas experiencias como empregadas da empresa. Na súa exposición estiveron acompañadas de Mª Soledad Espiño, directora de Termas de Cuntis, que resaltou que co seu bo facer e implicación demostran diariamente que están capacitadas para desenvolver o seu traballo. Na presentación, que contou coa presenza de SAR a infanta Dona Elena, Directora de Proxectos da FUNDACIÓN MAPFRE, tamén participaron Manuel Pérez Cabo, Vicepresidente de Down Galicia; José Ramón Girón, Presidente de Feafes; Coro Piñeiro, Secretaria Xeral de Política Social da Xunta de Galicia; David Rey, Director Territorial de MAPFRE Galicia Sur; Fernando Garrido, Director da Área de Acción Social da FUNDACIÓN MAPFRE; e Pedro Campos, Presidente do RCN de Sanxenxo.