O Grupo de Teatro de Down Compostela, composto por mozos e mozas coa Síndrome de Down e discapacidade intelectual dirixidos por Lucas Herrador, estreará a obra “Solo ante la Peligros”. Será o vindeiro fin de semana, 13 e 14 de xuño, ás 20.00 horas,  no Salón Teatro de Santiago de Compostela. O acceso á sala será libre, previa retirada da correspondente entrada nas billeteiras do Salón Teatro. Lucas Herrador optou nesta ocasión por unha versión moi persoal do western, “un xénero que, como Esperanza Aguirre, levanta adhesións ou rexeitamentos de maneira incondicional. Ou che gusta, ou o odias”. O director quixo dedicar esta obra, na que participan máis de 20 actores con discapacidade intelectual, a súa nai, “a muller máis valente, boa e alegre que coñezo, á que moitas veces vin sentada fronte ao televisor, emocionándose coas aventuras de John Wayne, Alan Ladd, Gary Cooper ou Clint Eastwood”, engade Herrador. Down Compostela contou este ano coa colaboración do pintor Rafael Romero Masiá, quen deseñou o cartel da obra. Os mozos e mozas do grupo de teatro levan moitos meses ensaiando “Solo ante la Peligros”. “Un espectáculo con máis de vinte actores en escena require moitas horas de traballo previo. A representación non sería posible sen a implicación de profesionais e familiares de Down Compostela que buscaron un oco nas súas axendas para botar unha man e que poidamos estrear a obra”, conclúe Lucas Herrador. Neste sentido cabe destacar que todo o vestiario da obra foi preparado e adaptado por Blanca Villar, quen montou o seu pequeno “obradoiro de costura” nas instalacións de Down Compostela.