Foi a única organización do terceiro sector de acción social que presentou comunicación e participou na mesa de experiencias, na súa calidade de entidade de referencia en formación e asesoramento nesta metodoloxía de ensino/aprendizaxe. Este Simposio, de carácter estatal e que foi celebrado en Vigo, congregou a mestres, profesores e asesores que están participando na aplicación do programa CA/AC (Cooperar para Aprender /Aprender para Cooperar). A Comunicación de Down Galicia levaba por título “Historias que cambian a Historia” e, a través da experiencia de tres alumnos/as que viven en distintos puntos de Galicia e que acoden a centros educativos ordinarios, abordou o reto que supón a etapa escolar para o alumnado que atopa máis barreiras para a aprendizaxe. Así, fixo un repaso polo proceso de cambio nas vidas destes alumnos e alumnas, e na dos seus compañeiros/as tras organizar a aula de acordo coa metodoloxía de Aprendizaxe Cooperativa. A Comunicación tamén recollía o valor engadido desta experiencia a través das das testemuñas dos nenos e das nenas que contaron como viron o cambio na escola e neles mesmos, mellorando as relacións, a comprensión mutua, tomando conciencia das capacidades de cada quen, e os beneficios de traballar en equipo e cooperativamente. En canto á mesa de experiencias, Down Galicia presentou a súa experiencia de coordinación con varios centros educativos nos que se está a traballar con esta metodoloxía. Na súa intervención as técnicos de educación expuxeron o punto de vista dos e das docentes, o retos aos que tiveron que facer fronte e a súa valoración do proceso e dos resultados. A nivel xeral, o máis destacado despois dun ano de traballar de xeito cooperativo foi unha maior corresponsabilidade do alumnado para sacar adiante os traballos na aula, máis participación e unión tanto na aula como nas actividades de ocio e, finalmente, demanda por parte do propio alumnado de seguir traballando en equipo.