Down Galicia crea un apartado web con distintos recursos para traballar e desfrutar sen saír da casa
O presidente da Xunta de Galicia, Alberto Núñez Feijoo, defendeu esta mañá na súa visita a Down Galicia e Down Compostela, a necesidade de apostar pola inserción laboral das persoas coa síndrome de Down e con discapacidade intelectual. “Son traballadores serios, responsables, que responden, e é necesario abrir un pouco máis o mercado laboral, tanto por parte da Administración como das empresas, para que conten con máis oportunidades laborais”, afirmou o presidente da Xunta. Neste sentido, explicou que desde a Administración autonómica están dispostos a ampliar a oferta de emprego público para persoas con discapacidade intelectual. Na mesma liña manifestouse Elías Ledo, un mozo coa síndrome de Down que forma parte da Xunta Directiva de Down Compostela, que no nome dos seus compañeiros e compañeiras reclamou máis oportunidades laborais. “Queremos traballo” afirmou contundente. Núñez Feijoo tamén fixo referencia á necesidade de que o colectivo de persoas con síndrome de Down e discapacidade intelectual conten cunha educación e formación de calidade e adecuada para a súa posterior inserción laboral e para conseguir autonomía persoal. Precisamente, a educación e a preocupación ante a entrada en vigor da LOMCE centraron parte da xuntanza privada que mantiveron os representantes das entidades Down co presidente da Xunta e coa secretaria xeral técnica da Consellería de Traballo e Benestar. Os presidentes de Down Galicia, Delmiro Prieto González, e de Down Compostela, Juan Martínez López, acompañados polo secretario de Down Compostela, Xaime López Martínez, e polo vogal de Down Compostela, Elías Ledo Vázquez, amosáronlle a Alberto Núñez Feijoo e a María Jesús Lorenzana as instalacións de Down Compostela e Down Galicia e os programas que desenvolven. Na visita tivo un papel protagonista o vocal de Down Compostela, Elías Ledo Vázquez, o mozo coa síndrome de Down que forma parte da Xunta Directiva desde o mes de xuño do ano pasado. Elías Ledo presentoulle ao presidente da Xunta os seus compañeiros e compañeiras que se atopaban nese momento no centro. Así foron visitando a sala de atención temperá, na que se traballa con nenos e nenas de menos de tres anos en aspectos relacionados coa psicomotricidade, as aulas de logopedia, de lectoescritura, de novas tecnoloxías, e a Sala Lar na que se realiza formación relacionada coa vida adulta e independente, como son as tarefas propias do fogar. Tamén visitaron o recinto exterior no que se realiza un obradoiro de xardinería e horticultura, e no que os mozos e mozas lle explicaron ao presidente e á secretaria xeral técnica como manteñen o xardín exterior y cultivan unha pequena horta.
Entradas relacionadas
