Mediante unha achega de 24.000 euros, a Obra Social “la Caixa” colabora co proxecto de Down Galicia “Vida independente para persoas coa síndrome de Down e/ou discapacidade intelectual”. Esta axuda enmárcase na Convocatoria de “Viviendas temporales de inclusión social 2015”, enfocada á realización de proxectos relacionados cos servizos de vivenda temporal para persoas en proceso de inclusión social. Para facer efectiva esta axuda, ambas entidades acaban de asinar un convenio de colaboración en virtude do cal, un total de 84 persoas con discapacidade intelectual, e en particular coa síndrome de Down, contarán cunha serie de apoios encamiñados a capacitalas para vivir de forma autónoma e independente fóra do fogar familiar. O obxectivo principal deste proxecto é o de favorecer, nas persoas coa síndrome de Down e discapacidade intelectual, o desenvolvemento de recursos e habilidades que contribúan á vida autónoma, independente e autoxestionada no propio fogar e na comunidade na que se desenvolven, garantindo para iso os recursos necesarios e a implicación das súas familias. O proxecto de Vida Adulta e Independente de Down Galicia lévase a cabo en vivendas situadas en Lugo, Vigo, Lugo, A Coruña e Santiago de Compostela, nas que se ofrece a oportunidade de emancipación con apoio ás persoas participantes, para que poidan decidir nun futuro se desexan vivir soas, en parella, ou con outras persoas.  Para iso, realízanse actividades encamiñadas a fomentar a convivencia, a responsabilidade, a autoxestión e as habilidades sociais e persoais necesarias para promover a toma de decisións e a capacidade para decidir como, cando e con quen quere vivir cada persoa.