Seis mozos e mozas de Compostela e seis de Vigo reciben esta semana unhas xornadas de formación intensiva como baristas. Durante estes días prepararanse para a competición que terá lugar o vindeiro domingo na terraza do restaurante santiagués Porta Faxeira (Rúa do Franco, 50), onde se celebrará o IV Campionato Barista Down de Galicia. Os participantes terán que preparar, ante xuíces baristas de recoñecido prestixio, dous cafés expresos, dous capuccinos decorados coa técnica do latte art e dous cócteles a base de café. Todos os participantes recibirán como premio a realización de prácticas laborais nos establecementos hostaleiros colaboradores de Santiago de Compostela e Vigo. Promovido por Cafento e Down Compostela Os Campionatos Baristas Down son unha iniciativa pioneira no mundo, nacida en Galicia en 2012, que buscan visibilizar ao colectivo de persoas coa síndrome de Down en termos positivos. O IV Campionato Barista de Galicia está coorganizado por Cafento, a Fundación Down Compostela, a asociación Down Vigo, Pousadas de Compostela e a Asociación de Empresarios de Hostalería de Santiago de Compostela. Conta coa colaboración de Crem International, Lau Creaciones e establecementos de hostalería de Compostela: AC Palacio do Carmen, Café La Mecca, Hotel Oca Puerta del Camino, NH Obradoiro, Parador Museo de Santiago, Tryp Santiago; e de Vigo: Café Bar Belén, Hesperia Vigo, Hotel Nagari, NH Palacio de Vigo, Pazo Los Escudos e Tryp Vigo Los Galeones. O Campionato Down máis internacional ata a data Estes certames chamaron a atención da prensa especializada internacional e chegaron a países como Canadá, Estados Unidos, Dinamarca e Italia. Nesta edición, o Campionato contará coa presenza de Gerald Fantone, creador do proxecto Made by Mavericks, que poñerá en marcha na cidade canadense de Toronto un instituto de formación barista especificamente dirixido a persoas coa síndrome de Down e discapacidade intelectual.